OSIPANA yoAfrican Stars oyo tuu tayi ti pii natango moliha yopombanda yetanga lyokoompadhi muka noBlack Africa oyo ngaa tuu natango ya landula mo.
Tigers oya dhengwa mo koBlue Waters yokOmbaye naashika oshe eta nee yi ye puutitano moliha ndjika yopombanda yetanga lyokoompadhi muka.
African Stars oyo natango tayi ti pii moliha yopombanda yetanga lyokoompadhi muka, sha landula sho ya dhenge mo osipana yedhina Benfica yokOshomeya nookoola mbali mowala.
Uudhano mboka owa li nee wa dhanenwa pokapale hoka ka lukilwa yohe yoshigwana shika tatekulu Sam Shafiishuna Nujoma.
Black Africa oyo yi li puutiyali, yi na iitsa omilongo ndatu niine, sha landula sho ya dhenge mo oUnited Stars nookoola ndatu mumbali.
African Stars okwa kundanekwa ya li lela ya dhengwa okupita aadhanitanga yokonima yoBenfica nopokafudho oya yi po inaaya tula mo nando okoola yimwe.
Ookoola ndhoka mbali, Stars ya ka tula mo odha medhingoloko etiyali odha tulwa mo nee kuJoslin Kamatuka naDennis Ngueza.
Esindano ndyoka olye eta nee African Stars oyo yi kale tayi ti pii moliha ndjoka yi na iitsa omilongo ne niine momaudhano omulongo nagahetatu.
Tigers oya dhengwa mo koBlue Waters nookoola mbali muyimwe, nuudhano mboka owa li wa dhanenwa pokapale ko-SKW.
Blue Waters okwa kundanekwa ya li ya dhana naadhanitanga ye li ashike omulongo oku ya pehulilo lyedhingoloko lyotango, sha landula sho Festus Ndinhwa a li a tidhwa mo, sho a pewa okakalata okatiyali okashunga.
Iizemo mbyoka oye eta nee oBlue Waters yi ye puutine, yi na iitsa omilongo ndatu omanga Tigers ya yi puutitano niitsa omilongo mbali nomugoyi. Tura Magic oye ya puutihamano, sho ya dhenge mo Touch & Go yokOtavi nookoola ndatu mowala.
Okoola mbali dhoTura Magic odha tulwa mo kuPeter Shalulile nayimwe oya tulwa mo kuTheophelus Junias. Esindano ndyoka olye eta nee oTura Magic yi kale yi na iitsa omilongo mbali niihetatu noyi na ko wo uudhano wumwe inaayi wu dhana.
Momaudhano wo galwe ga li ko mOlyomakaya, Eleven Arrows oya dhenge mo oRebels nookoola mbali mowala, osipana yaUnam tayi dhana shi thike pamwe yimwe muyimwe noJulinho Sporting. Citizens noMighty Gunners yokOtjiwarongo nadho wo odha dhana shi thike pamwe yimwe muyimwe.
Muudhano wa li ko mEtitano kongulohi, Orlando Pirates oya dhenge mo oCivics nokoola yimwe mowala niizemo mbika oye eta oPirates yi ye puutitatu yi na iitsa omilongo ndatu niiyali.
