Ngoka a li omuniilonga mehangano lyooansuransi ano lyomakwashilipaleko, Daniel Kashima (41) okwa popi kutya oyana yaali oya lalekwa mo mosikola yopaumwene mOshakati sho a nyengwa oku ya futila osikola molwashoka okuli mondjeedhililo.
Kashima, oye gumwe gwomaalumentu yatatu mboka taya tamanekelwa olunyala meyako lyoshimaliwa shoomiliyona N$2.2 mehangano lyomakwashilipaleko lyedhina Momentum Metropolitan noshimaliwa shoka okwa li sha pungulwa mehangano ndyoka komukalimo gwomOngwediva, Andalberd Shilongo.
Kashima okwa holoka mOmpangu yaMangestrata gwaShakati mOmaandaha miihokolola yonkambadhala yokupewa oboloha.
Okwa lombwele ompangu kutya ota nana nondatu okufutila aanona ye osikola.
“Inandi kala we tandi vulu okufuta osikola yawo okuza sho nda tulwa mondjeedhililo momasiku 19 Mei 2026,” osho a popi ngaaka.
Pauyelele wa gandjwa kuKashima, aanona ye yaali oya lalekwa mo mosikola tayi adhika mOshakati muJuni sha landula sho oondjo dhosikola yaanona mboka yaali dha thiki pooN$14 100.
Okwa popi kutya okuza mpoka aanona ye oya waimine osikola yopaumwene mOkahao, ndjoka a popi kutya oya mumwayinakadhona gwe opamwe naaniipambuliko yalwe.
Kashima okwa lombwele ompangu kutya osikola ndjoka yokOkahao oye mu pa esilohenda lyoomwedhi ndatu a kale a futila aanona ye, nesilohenda ndyoka olyi li pokupwa ko ngashingeyi.
“Ondiwete kutya ngele onda kala inaandi futa nena aanona otaya ka lalekwa mo mosikola,” osho a popi ngaaka.
Okwa lombwele ompangu kutya kosikola ndjoka ompe oha pulwa ofuto yooN$5 000 komwedhi.
Kashima okwa popi kutya okuna woo oshinakugwanithwa shokusila oshimpwiyu aanona ye yalwe yaali, naashoka osha gwedha omutengi omudhigu kuye unene tuu okutala kutya ngashingeyi okwa kala mongali.
Pauyelele woodokumente dhomompangu, oshimaliwa shoomiliyona N$2.2 otaku hokololwa sha lundululwa ko komapungulilo gaShilongo nokutulwa kokambo kokoNamPost muFebuluali numvo.
Omutamaneki gwepangelo Yeukai Kangira okwa lombwele ompangu omwedhi gwa zi ko kutya Kashima osho wo aafekelwa pamwe naye ayehe oya li nuuthemba wokukutha oshimaliwa kokambo hoka ka totwa nelalakano lyokundjondjelwa oshimaliwa.
Pauyelele womutamaneki, oshimaliwa shoomiliyona N$2 shoka sha yakwa okwa li sha longithwa po muule wethimbo efupi.
Oshimaliwa shooN$200 000 osho owala sha adhika kokambo pethimbo ombelewa yomutamanekindjayi ya pewa uuthemba wopaveta kOmpangu yoPombanda opo ya kwate ko oshimaliwa shoka sha hupa kokambo.
Oodokumente dhomompangu odha popi kutya oshitopolwa shoshimaliwa shoka osha longithwa okulanda iihauto itatu – shimwe shomiihauto mbyoka eshete (Mercedes-Benz C200) lyaKashima, ndyoka lwanima lya kwatwa po kepangelo.
Oshihauto shoka otaku hokololwa sha landwa kohi yedhina lyehangano lyontumba.
Oshipotha sheyako nuukengeleledhi tawu tamanekelwa Kashima otaku hokololwa shina ongundu yaafekelwa mboka ya longo mo uulingilingi mboka okupitila kombunda yaKashima.
