Ovanhu ve li vanhe ova xulifila moshiponga shoihauto mondjila yoC33 pokati koKaribib nOmaruru onguloshi yOlomakaya.
Opolifi kErongo oya ti oshiponga eshi osha ningwa potundi 20h00, eekilomita di li lwopo22 okudja koKaribib wa yuka kOmaruru, eshi okatuwa kashona ka umbata ovanhu vahamano ke lidenga mololi oyo vati kwa li ya fikama mokati kondjila tai kendabala okutanauka i shune oku tai di.
Omushingi wokatuwa kashona, Cassius Katamo (49), okwa xulifila poshiponga naSelma Kataturua (73 ) naSilba Ndjiharine (52), ova ka xulifila koshipangelo kOmaruru.
Opolifi oya ti ovatwaalelwa vavali va xupa, omulumenhu (59) nomukainhu (62), ova lemana lela nokwa li va tuminwa koshipangelo shepangelo shaKatutura oko va lopotwa kutya ove li monghalo ii neenghono ashike itai lunduluka.
“Omushingi wololi, omukwashiwana waZimbabwe, vati okwa li a fikama pondje yololi pefimbo loshiponga,” opolifi osho ya ti ngaho.
Ololi okwa li i na onomola yaMbaye, omangha okahauto kashona ke na ya Venduka.
Opolifi oya ti ovakwapata voonakufya ova shiivifilwa nomakonakono otaa twilile.
4th story
