Va efa ofikola eshiva ninga omateelelo

… onghalo tai nyemateke younona tava ningi omateelelo mOhangwena

Dolly Joseph (16) oye umwe womounona ovo va ninga omadimo ovo ve li mewalanda loshipangelo shaEenhana va teelela.

Okwa kala e li mewalanda omu oule woivike itatu a teelela efiku laye lokumona okaana olo taku tiwa otashi dulika li kale oshivike eshi.

Ewalanda eli ola idilila ovakainhu ovo va teelela okumona ounona veedula da yooloka, ovo va pumbwa okukala popepi noshipangelo shaashi omafiku avo okumona okwa fika.

Dolly, okwa dja kEpembe moshitopolwahoololo shaHangwena, nokwa li a xulifa po okuya kofikola mondodo 9, omanga kwa li e na eteelelo leemwedi nhatu.

Okwa lombwela oThe Namibian oshivike eshi kutya kakwa li vali ta dulu okutwikila nofikola yaye molwokatongotongo nokuningwa nai eshi eteelelo laye tali ningi lakula.

“Onda tokola okufiya po ofikola, shaashi ondi shi shi nale kutya pexulilo lefiku ondi na ashike okufiya po ofikola. Ngee nda mono okaana, olye ta kala nokaana? Ohandi di nameekulu nameme mumwaina wameme, ashike ohava kala ve lipyakadila nounona vakwao, meme oha ka landifa oinima yaye opo a mone oiyemo, shaashi kapu na vali omunhu ou ha longo. Otwa tala ashike moshimaliwa osho ha ningi nomopendjela yameekulu,” Dolly osho a ti ngaho.

Okwa ti okamati aka ke mu mitika okwe ka shakeneka eshi kwa li ta i naashi ta di kofikola.

“Ihatu i kofikola imwe ashike ohatu di momukunda umwe. Oku na eedula 18 noku li mondodo 11. Natango ohai kofikola ndee natango kandi shi kutya ohatu ka yambidida ngahelipi okaana shaashi atushe ihatu longo. Onde lineekela kutya ovakwapata vetu otava ka kala nokutuvatela okulanda omilambo nomakumbafa okaana.”

Okwa ti okwa li a fya ohoni yokukonga eepela dokukelela omateelelo koshipangelo.

“Inandi enda nale koshipangelo handi kongo eepela dokukelela omateelelo, medina ashike lohoni. Kapu na omunhu a hala vanailonga vomoshipangelo va mone kutya oha i moixulo shaashi owa tila kutya pamwe otava ka popya.”

Okwa ti ohava mono omahongo kombinga yoinima ya pamba oixulo, ashike ihava kala ve udite ko nawa aveshe.

Dolly natango oku na elineekelo kutya ota ka shuna mofikola opo a dule okumana ofikola yaye.

“Onda hala okwaalukila kofikola, ashike nee, kandi shi kutya onaini, shaashi ondi na okutonatela okaana ngee ka dalwa,” Osho a ti ngaho.
Elizabeth Haufiku (15) naye oku li mewalanda omo. Okwa dja kOmundaungilo, popepi noAngola.

Ngaashi naana oDolly, Elizabeth naye okwa xulifa po ofikola medina leteelelo. Okwa li e li mondodo 10.

Elizabeth okwa ti ohadi nameme waye ashike iha longo navamwaina vamwe ve li vatanho ovo hava i kofikola aveshe. Okwa ti meme waye oha mono ashike oshimaliwa mokulandifa oinima yaye keedoolopa odo di li popepi nokeependjela.

Kapu na vali odjo yoiyemo mofamili.

Elizabeth okwa ti okwe lineekela ashike kutya meme waye ota ka dula okuvatela eumbo alishe mwa kwatelwa nokaana kaye.

Elizabeth okwe ya ashike kewalanda eha na nande oshimaliwa ile oikulya. Okwa tala ashike muvakwao ovo navo ve ya okuteelela opo a xupe fiyo ota mono okaana a dule okushuna keumbo.

“Ondi shi vakwetu vahapu ovo va fiya po ofikola molwomateelelo nonda kala ndi shi shi kutya naame osho ndi na okuninga. Onde shi tambula ko shaashi osho hashi ningwa koukadona vakwetu. Ondi shi shi kutya ondi mushona noinandi lilongekida okuninga omudali, ashike ondi na nale eteelelo, onghee nee onde shi tambula ko ashike.”