AAKALIMO moKatutura oya li ya mbombolokele kositola yimwe moSoweto oku ka landa uumbisikiti kondando ya shewa oshoka mboka owa li wa kusha.
Uumbisikiti mboka otaku tiwa owa li woo wa landithwa pamwe niilandithomwa yimwe mbyoka ya ndonyoka nenge ya ehamekwa. Ofanditha yiinima ya tulwa mumwe oya li ashike aniwa tayi gu oodola 19-99 na oya tamekele olyomakaya oshiwike shayi.Pahapu dhomuwiliki gumwe eli momadhewo, uumbisikiti noshowo iilandithomwa mbyoka ya li mofanditha oombyoka yeehama nenge miikwatelwa moka yili oya yonuka nenge ya tuuka kashona. Okwa ti nonando uubiskiti mboka owa pitililapo pesiku lyawo lyokukusha, mbuka otawu vulu natango okuliwa uule woomwedhi okuza pesiku lyawo lyokukusha.Okwa ti yo kaya li taya longo epuko oshoka oonaku landa oya li ya tseyithilwa kutya shoka taya landa kashili nawa. Ndele omuwiliki gwomalanditho gwelyenge lyoositola ndhoka dha Woerman Brock, Konrad Schwieger okwa pangula oshinima shoka a ti aaniilonga mboka naya ethepo oshinima shoka shoku landitha iinima yakulupa. Okwa ti otaya ka tameka ekonakono moshinima shika, nokuuvaneke kutya oonkatu otadhi ka katukwa.Okwa pula woo ngele opena omuntu ngoka a ehamekwa kuumbiskiti mboka opo a kwatathane naye mbala. Oshifo sho The Namibian sho sha talelepo ositola ndjoka metiyali oshiwike shika opwali aaantu oyendji natango taya kambadhala okulanda iinima mbyoka.Omulandi gumwe okwa ti aantu otaya landa uumbisikiti mboka molwaashoka mboka owuna ombiliha ndele uupyakadhi oomboka kutya mbuka owa kusha na otawu vulu oku yeehameka momapunda, unene tuu sho aalandi taya kalya uumbisikiti mboka owindji noonkondo. Okuwu lya owindji okwo tashi vulika kuyeetele oshiponga.Omulandi gumwe, Timoteus Haukongo okwa ti kewete ositola ya ninga epuko oshoka omulandi kehe okwa lombwelwa kutya uumbiskiti owa kusha. Sho omupopiliko gwelelo lya Venduka a pulwa kombinga yaashika, Josua Amukugo okwa uvaneke ta ka konakona shika.
