… omulumentu a hepekwa nokutsuwa kohondakadhona moGobabis
Omulumentu gwomimvo 42 okwa hokolola kutya okwa monithwa iihuna noonkondo yolutu kohondakadhona ye, nolwahugunina okwa li nokuli a hupu meso sho taku hokololwa a tsuwa nombele mepunda, omwedhi gwa zi ko.
David Suze okwa lombwele oshifokundaneki shika kutya oshiningwanima shoka osha ningwa muMei pegumbo lyaandjawo moGobabis, konima sho a tokola okuhulitha po ekwatathano lyawo lyopaihole.
“Omolwiilonga, ihandi longo moGobabis nonkene esiku nda galukile kegumbo, onda adha taya tembuka mo maandjetu. Megumbo okwa li nda thiki mo ongulohi lwopotundi 22h00 sho nda adha ohondakadhona yandje namumwayinagona gwe taya tembuka mo megumbo.
Onde ya lombwele kutya oya manguluka okutembuka nombili, shampa owala itaaya piyaganeke ndje nenge yuulukile ndje ondhino,” osho a popi ngaaka.
Omanga ye li po, Suze okwa popi kutya oontamanana odha tukuka pokati kohondakadhona ye namumwayinagona, naashoka osha hulile molugodhi.
“Ohaluka ohondakadhona yandje okwe ya nokutsa ndje nombele mepunda,” osho a popi ngaaka.
Okwa popi kutya okuza mpoka okwayi koshitaasi shopolisi, nokwa tuminwa koshipangelo a ka mone uuhaku.
“Sho nda thiki poshitaasi shopolisi epulo lyotango nda pulwa otali ti: ‘Owe mu ningi shike opo e ku tse?’ Otandi zi ombinzi, nondi li muuwehame, itamu vulu okukwathelandje?”
olyo epula ta dhimbulukwa a pula ndyoka, nokwa gwedhapo kutya epulo a pulwa kaapolisi okwa li lye mu uvitha nayi.
Suze okwa popi kutya okwa pangwa mOshipangelo shEpangelo shaGobabis, sho nokuli a mono etando.
Lwanima okwa tuminwa koshipangelo shaKatutura mOvenduka, hoka a kala uule wiiwike iyali moombete ta mono uuhaku.
Okwa popi kutya iilalo okwa li ye mu etele uuvu nokukwatwa kepupyalo.
“Okonyala ndi mane oondjenda.
Onda li muuwehame noonkondo, nonda li nepupyalo osho wo nda kwatwa kuuvu” osho a popi ngaaka.
Suze okwa popi kutya sho a lalekwa moshipangelo, oontamanana pokati ke nohondakadhona odha tsikile.
Muule woomvula ntano Suze a kala nohondakadhona ye ndjoka, okwa li ya pewa omagano gokanona komimvo ndatu.
Suze okwa popi kutya onkalonayi pokati ke nohondakadhona oya gumu wo ekwatathano lye nomwana.
“Opwa pita ngashingeyi omwedhi inaandi mona omumwandje,” osho a popi ngaaka.
Suze okwa popi kutya sigo ongashingeyi ota hepekwa komadhiladhilo nolutu opo talu hwepopala ongoshizemo shekwatathano lyawo lyopaihole ndyoka lya kala lya nika iipa yombwa.
Okwiindile aalumentu mboka ya taalelwa konkalo ya fa ye ya konge omakwatho kuyele yo ya yande onkone.
“Ngungumana, eto kongo omilandu ndhoka wuna okulandula.
Inwiikuthila nande oveta momake. Ngele owa dhinika [kaapolisi], inda nomuntu a kale onzapo yoye opo wu shi lopote ko wa manguluka,” osho a popi ngaaka.
Okwa gwedhapo kutya aalumentu inaya kala we haya mwenene omahepeko omolwohoni nuumbanda waakwashigwana.
“Ando ongame nde mu tsile nombele, ando onda patelwa mo nale,” osho a popi ngaaka.
Omupevikomufala mopolisi yoshitopolwa shaMaheke Chris Kalimbula okwa koleke oshiningwanima shoka.
“Otandi koleke kutya oshipotha osha patululwa nomakonakono gopolisi otaga pula komeho,” osho Kalimbula a popi ngaaka.
Okwa popi kutya omufekelwa ina tulwa natango miipandeko molwashoka oshipotha shoka osha patululwa owala mEtiyali lyoshiwike shika.
Pethimbo ndika Namibia e li mOmwedhi gUundjolowele woPamadhiladhilo mAalumentu, omunawino gwiipambele yopamadhiladhilo, Ceaseria Mutau okwa popi kutya aalumentu mboka haya ningilwa omahepeko gomomagumbo olundji ohaya mono iihuna yopamadhiladhilo.
Omahepeko gopamadhiladhilo ohaga kwatele mo uumbanda osho wo ethindakano lyopamadhiladhilo Okwa popi wo kutya eitaalo lyaakwashigwana kombinga yeidhidhimiko lyaalumentu shimwe wo shomwaambyoka hayi imbi aalumentu kaaya lopote omahepeko nenge okukonga omakwatho.
Mwene gwehangano lyokupopila nokunkondopeka aalumentu pamadhiladhilo moshilongo lyedhina Progressive Men Empowerment Organisation of Namibia, Fillemon Amoolongo okwa popi kutya olundji iiningwanima yomahepeko taga ningilwa aalumentu ihayi lopotwa omolwuumbanda wokushundulwa moshigwana osho wo uumbanda wokumonika uukatalume.
Amoolongo okwa popi kutya aalumentu oyendji ohaya mono iihuna meimweneneno omolwuumbanda wokupopiwa osho wo okuulwa aakatalume uuna ya lopota omahepeko taya ningilwa.
