Opolifi moshitopolwahoololo shaShikoto otai konakona oshipofa shekwatongonga vati lokakadona (14) komukwashiwana waAngola.
Omupopiliko wopolifi wopashiwana omupedu komisina Kauna Shikwambi okwa ti omufeekelwa (17) omunailonga womeumbo poushiinda wanakuningwa oshihakanwa.
Oshiningwanima vati osha ningwa komukunda wedina Onamanyoka moshikandjohoololo shaMuthiya Olomakaya.
“Omufeekelwa vati okwe livakela monduda yanakuningwa oshihakanwa ndee te mu ningile omatilifo oku mu dipaya ngee okwa anye okuya naye momilele,” Shikwambi osho a ti ngaho.
Okwa ti meme wokakadona okwa mona eemhadi domumati ongula ndee te di shikula fiyo okonduda yakakadona, oko okakadona ke mu lombwela osho sha ningwa po.
“Okwa mangwa po nokwa teelelika a holoke momhangu yamagestrata mOndangwa Omaandaxa,” Shikwambi osho a ti ngaho.
Moshiningwanima shimwe shi lili komukunda Onakagala moshitopolwa shaMuntele, omukulupe (81) okwa li a nyekwa oshimaliwa shaye shopendjela shi fike poN$2 500 Etitano.
Ovafeekelwa vavali vomido 24 no26 okwa li va mangwa po.
“Ovafeekelwa ova ponokela nakuningwa oshihakanwa okudja konima mangha kwa li e li mondjila yaye a yuka keumbo ndee tave mu nyeke oimaliwa yaye,” Shikwambi osho a ti ngaho.
Kapu na nande oshimaliwa sha monika po, novafeekelwa vavali okwa li va teelelika va holoke momhangu yamagestrata mOndangwa Omaandaxa.
Moshiningwanima vali shimwe sha yooloka, omushingi wololi (37) okwa xupa moshiponga shomopate Olomakaya konguloshi eshi ololi oyo kwa li ta shingi ya alangata konooli yOtjiwarongo moshitopolwahoololo shaTjozondjupa.
Omuunganeki womakonakono oimbuluma mOtjozondjupa omupedu komisina Edna Nawa Oshoondaxa okwa ti oshiponga osha ningilwa eekilomita di li lwopo20 konooli yOtjiwarongo mondjila yakula yoB1 pokati kOtavi nOtjiwarongo.
“Osho sha etifa oshiponga eshi natango kashi shiivike shaashi omushingi wololi okwa faduka po nde ololi te i fiye po,” osho a ti ngaho.
Ololi okwa li ya yuka kOtjiwarongo pefimbo opo oshiponga sha ningwa nokwa li ya umbata oipakete yomakende, Nawa osho a ti ngaho.
Omakonakono opolifi otaa twikile moiningwanima aishe ei.
-NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
