HARARE – Omuleli gwongundu yompilameno koZimbabwe, omusamane Morgan Tsvangirai, otaku hokololwa kutya okwa tinda okutumbula ngoka ta keelele peha lye manga ta ti po hwepo.
Tsvangirai oku na aapeha ye ye li yatatu, ihe pamahokololo, ina tumbula po nando ogumwe ngoka ta wilike ongundu manga e li mombete yuuvu.
Tsvangirai okwa falelwe nanelomba koshipangelo koSouth Africa konima yoshiwike ngashingeyi, sho a kwatwa kuuvu.
Omunamimvo 65 Tsvangirai oku li kepangelo lyomukithi gwokaankela.
Shimwe shomiikundaneki yokoZimbabwe, New Zimbabwe.com, osha kundaneke kutya Tsvangirai okwi iyageka okutopagula ongundu sho ina hala okutumbula ngoka ta keelele poshipundi she, mokati kaapeha ye ye li yatatu, manga a tegelela a aluke.
Palopota ndjoka, Tsvangirai okwa tseyithile oshiwike sha zi ko kutya oku na aapeha ye li yatatu, Thokozani Khuphe, Nelson Chamisa naElisa Madzuru, yo oyo taa kwatele komeho ongundu.
