Ovadali ovo vehe na oilonga vokoHavana mOvenduka otava ti otava mono oixuna kokufila oshisho elongo lavo olo li na ashike oivike ihamano.
Ounona okwa li va dalwa inava kola momafiku 18 Febuluali moshipangelo shaCentral mOvenduka.
Ester Nghipewa (28) okwa ti oshidjuu okunyamifa wa fya ondjala.
Shaashi ita dulu okuninga omashini ounona vaye, paife okwa tala momashini omondooxa, ashike ita dulu okukala ta lande omashini aa shaasho ke na oilonga.
“Movenduka onde ya mo momudo 2018 opo ndi twikile ofikola yange ongomuhongwapangi,” Meme wounona vahamano osho a ti ngaho.
Nghipewa okwa ti yee nomuholike waye, Hepali Hetwali (29), ihava dulu okulanda oikulya, omilambo, oikutu ile omashini ounona.
Okwa pandula omunhu oo hemu vatele fiyo opapa.
“Omushiinda wange ohetu vatele noikulya omafimbo ahapu,” Osho a ti ngaho.
Nghipewa okwa ti okaana kaye kamwe ke na eedula mbali nelongo laye ihava mono opendjela natango okudja kepangelo.
Eshi ve linyolifa koministili yoGender ova lombwelwa kutya otava tameke ashike okutambula opendjela muJuli, osho a ti ngaho.
Hetwali okwa ti ke na oshimaliwa opo a tameke ongeshefa, nande ngaa okulandifa okapana.
“Onda hala oilonga nohandi dulu okulonga keshe oilonga yokomake opo di dule okuxupifa ofamili yange,” Osho a ti ngaho.
Hetwali okwa ti okwa li ha longo nale ongomupaindi ashike okwa fiwa ehe na oilonga konima eshi oilonga ya pwa po.
Okwa ti mOvenduka okwe ya mo konima yeedula omulongo konima eshi a efa ofikola mondodo 9 eshi ovadali vaye va xula ko.
“Kakwa li pu na ou ta file nge oshisho ile ta yambidida ofikola yange,” Osho a ti ngaho.
Ookaume ava paife ohava di mokambashu kakaume kavo, notava pula oshiwana opo shi va vatele.
Omushiinda wavo umwe, Laimi Tindu (34), okwa ti: “Ova yambekwa nelongo, ashike okulifila oshisho osha kala shidjuu neenghono. Ohandi va pe oikulya omafimbo amwe ngee ndi na ya wana.
Kansela wokoshikandjohoololo shaMoses Garoeb, Stephanus Ndengu, okwa ti Nghipewa naHetwali ova kala nokutalela po ombelewa yaye tava kongo evatelo.
“Ombelewa yange oye va pa oikulya, nohandi dulu okuvashangela omukandapopilo opo va dule okukakonga omavatelo pamwe vali,” Osho a ti ngaho.
Ndengu ota pula oshiwana opo shi vatele ovanhu ava.
Minista woipambele youkakwashikekookanhu, Doreen Sioka, okwa ti ke na nande ouyelele kombinga yoshinima eshi, nande oinima i li ngaha luhapu ohai talika ko nawa ngee tashi ya komayambidido eependjela depangelo.
“Elongo ohali talika ko nawa koministili nokwa li va pumbwa okupewa omavatelo diva ngaashi tashi dulika,” Osho a ti ngaho.
Sioka natango okwa pula oThe Namibian opo i ye komukulunhuwiliki wonghalonawa younona opo a lombwele oministili kutya ounona ava ove li peni.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
