Ta futifwa oimaliwa oyo a kengelelako-NSFAF

Omunailonga mu kulu wehangono olo hali futile ovalihongi ledina Namibia Students Financial Assitance Fund (NSFAF) okwa tota po omukalo opo a kufe oshimaliwa shi fike lwopo-N$530 000 kombaanga yehangano ta tula kombaanga yomunhu oo ina ufwa okumona evatelo loshimaliwa okudja kehangano eli.

Omhupanguli Boas Usiku, okwa tokola ngaha momhangu yopombada mOvenduka mEtitano.

Usiku okwa tokola opo Tomas Konghola, a fute oshimaliwa shi fike po-N$529 250 kehangano laNSFAF.

Natango okwa pula Konghola opo a fute oishoshela ya wedwa po yeelepesenda 20 kodula yoshimaliwa sho-N529 250 fiyo otashi wana po, yee natango nafute oimaliwa oyo ehangano la longifa movakalelipo vopaveta pefimbo lomhangu.

Epangulo eli ola ningwa konima eshi ehangano eli kwa li hali longelwa kuKonghola le mu tulila mo oshibofa mJuuli 2021.

Konghola okwa li ha longele ehangano eli okudja muNovemba 2014 fiyo oMaalisa 2021, eshi a fiya po oilonga pefimbo a taalele omapulaapulo koilonga.

Omanga ina fiya po oilonga, okwa li manga a tulwa pedu muOctoba 2020, manga kwa li ehangano tali ningi omakonaakono kombinga yoshimaliwa osho la futa shihe li pamulandu omo mwa li mwa kwatelwa Konghola.

Usiku okwa ti oumbangi ou a pewa owa ulika kutya okudja muOctoba 2016 fiyo omuApilili 2019 oshimaliwa shi fike po-N$529 250 osha futwa kuNSFAF kombaanga yaNelson Sheefeni.

Oshimaliwa eshi okwa li sha futwa kuKonghola ashike osha kolekwa kuvakwao, ovanailongo va kula vehangono.

Oumbangi oo inau patanekwa wa yandjwa kuvavali vomovanailongo vehangano eli owa ti Sheefeni ina pumbwa nande okufutilwa kehangano eli, nonghee nee ina pumbwa nande okumona oshimaliwa tashi di kehangano eli, Usiku osho a ti mepangulo laye.

Usiku okwa ti Konghola okwa longekida eembapila dihe li paveta di kalele po Sheefeni onga ta dulu okumona evatelo okudja kehangano laNSFAF, eembapila oda ulika kutya Sheefeni oha fikola koInternational University of Management mOvenduka, ashike odi na eenomola dovahongwa da yooloka, tave lihongele oinima ya yooloka, do odi na eenomola doumutwe da yooloka.

Eefoloma dimwe domafutilo da longekidwa kuKonghola odi na edina nomaukwatya omulihongi ha futilwa kuNSFAF, ashike nado odi na onomola yombaanga yaSheefeni.

Usiku okwa ti: “Okudja momishangwa, osha yela kutya kashi shi epuko noshi li pehalo laKonghola eshi a longekida eembapila, eshi sha ulikwa komukalo oo Konghola e di longekida.”

Okwa weda po ta ti okwa itavele oumbangi ou wa yandjwa keembangi mbali dokoNSFAF shaashi owa ulika kutya Konghola, okwa longekida omukalo owina nokwa kwashilipaleka kutya oimaliwa oya tumwa okudja kombaanga yehangano ya yuka kombaanga yaNelson Sheefeni”.

Usiku okwa ti natango Konghola okwa kala eshi shi kutya ota longo oumbudi eshi ta longekida eembapila odo a longifa opo a tume oshimaliwa okudja kombaanga yehangano.

Konghola okwe lipataana kutya ka li eshi shi ngee ovanhu ovo inava pumbwa okufutilwa kehangano, naashi takutiwa okwa lombwelwa kutya inava tambulwa oipupulu, Usiku osho a ti ngaho.

Okwa ti natango opwa li pu na oumbangi inau patanekwa okudja kombangi imwe tau ti kombaanga yaKonghola okwa ya oshimaliwa shi fike peemiliyona N$2,56 pefimbo Konghola ta longele ehangano olo tuu olo, ashike oimaliwa oyo oi dulife oyo ha mono okudja koNSFAF.

Konghola okwa lombwela omhangu kutya okwa kala ha landifa omahauto a kulu, yee okwa kala e na onduda yomalandifilo hai landifa omalodu, omo ta ti omo a kala ha mono oiyemo yaye imwe.

Okwa ti ina kala eshi eta poluhaala kutya okuna eengeshefa shaashi kadi na eembapila.

Koshinima shi li ngaha Usiku okwa ti pefimbo Konghola ta longele o-NSFAF kombaanga yaye okwa kala nokuya oimaliwa ihapu kuhe shiivike apa hai di.

Ehangano loNSFAF okwa li la kalelwa po kuhaende Francois Bongamwabo pefimbo lomhangu, omanga Mbanga Siyomunji a li a kalela po Konghola.