Swartbooi okwa ti ame elai – Oshilyo sho LPM

Omakulukuto mongudu yoLandless People’s Movement natango otaa pula ashike komesho nomalundilo nomatukano pokati kovawiliki vongudu.

Harald Kambrude, oshilyo shoLPM mopaliamente noku li kamusela koshikandjohoolo shaRehoboth okwa lundila omuleli wongudu kutya okwa kala ina hala a kufe ombinga moinima ya fimana yongudu oule weedula mbali paife.

Momapulaapulo noThe Namibian Omandaxa, Kambrude okwa ti ovaleli vongudu ovo ve li pombada otave liumbatele ongudu ya fa omaumbo, eefaalama neengeshefa davo dopaumwene nohava udu nawa kokushinda ovanhu ovo va yooloka ile ve na omadilaadilo a yooloka ku avo.
Okwa ti ekwatafano laye napelesidente woLPM Bernadus Swartbooi ola ya nai neenghono.

Inava popya oule weedula da yuka pumbali konima eshi vati Swartbooi e mu ufana kutya yee omhepo ya kaka koshoongalele shongudu koSwakopmund momudo 2022.

Kambrude okwa ti omapopya aye kombinga yongudu ko//Kharas aa eta opo Swartbooi e mu tuke.

Okwa ti kutya Swartbooi okwe mu ufana elai koshoongalele shookamusela muJanuali 2023, oko kwa li Kambrude ina shifwa.

“Swartbooi okwa ti ame nghi shi sha, okwa li ashike omutooli womakende omanga ongudu ina ninga nge omunhu,” Kambrude osho a ti ngaho.
Okwa ti ovanhu ve li omuwoi ova lopota omatukano aSwartbooi ku ye.

Kambrude okwa ti okwa itavela kutya ovaleli vongudu ove mu tula manga pomunghulo.

Okwa ti okwa kala ina kwatelwa mo moivilo yongudu okudja ngaa momudo 2022 nokwa li a kufwa mo mokangudu mutima konima eshi kwa li a nyenyeta kombinga nghee elelo longudu tali ungangaunga noinima yongudu.

Kambrude oumwe womookamusela vahamano ovo va kalela po oLPM meumbo lopashiwana.
“Ame omunhu ou nde liteekwa mongudu,” Osho a ti ngaho.

Kambrude okwa ti elelo longudu ole mu kufa mo natango mongudu mutima konima eshi a nyenyeta kutya otava teya po ongudu.

“Ova tokola ashike va kufe nge mo. Fiyo onena, fye naSwartbooi inatu popya. Okwa vakela nge kepatululo lopaliamente odula ei ndee hatu popi ashike oinima i shona, ndee ta i.

“Paife ota lombwele ovanhu kutya ohatu popi. Itatu popi,” Osho a ti ngaho.

Momukanda wa yuka kuKambrude wa dja kuhamushangandjai wongudu:
“Owa kufwa mo filufilu mongudu mutima yongudu.”

Kambrude okwa ti Swartbooi okuna onghone nai.

Okwa ti okangudu kaSwartbooi kombelewa yavo ya kula mOvenduka okwa li ke li ominge nomupedu pelesidente wongudu Henny Seibeb.
“Ova hala Seibeb a ningulule omapopyo aye. Ove li ashike novanhu ovo hava itavele keshe shimwe,” Osho a ti ngaho.

‘OUTONDWE, NODINO’

Omupopiliko woLPM Lifalaza Simataa mOmaandaxa okwaanya omapopyo aKambrude.

Okwa hokolola kutya Kambrude omu djuu nokulonga naye yee okuna odino.

“Ohapopi ta endelele nonyanya noho, ashike nee oinima ei okwa li ashike omadilaadilo a yooloka, ndee kashi shi nande omayooloko momilandu nopolotika,” Lifalaza osho a ti ngaho.

“Kambrude okwe li kufa mo mongudu,” Osho a ti ngaho.

Simaata okwa ti kamusela iha nyamukula koikundafanwa yongudu, oha tanguna noilyo noha ningi ongudu nai.

Okwa ti Kambrude okwa li a kufwa mo mongudu mutima shi na sha nelikufe mo laye nomaliumbato aye mongudu.
Simaata okwa ti Swartbooi ina ula nande Kambrude omhepo ya kaka ile elai.

“Ongudu nande ongaho, oya mona kutya itai mu etele onghenda opo a mane ko oshikako shaye molweedula daye. Ashike nee, okwa ninga omatilifo kutya ota xulifa po oilonga ndee ta kufa ombinga ongokandidate ye likalela po yoovene, ashike natango oku li oshilyo shongudu, ina xulifa po oilonga,” Simataa osho a ti ngaho..

‘OKWA NGWANGWANA’

Moshiningwanima vali shimwe shongudu, omupedu hamushangandjai woLPM, Eneas Emvula, okwa ti omupedu pelesidente wongudu Henny Seibeb, okwa ngwangwana eshi okwe shi popya komalungula omafiku aa.

Okwa lombwela oThe Namibian Oshoondaxa kutya Seibeb ota kala a ngwangwana fiyo ota yeleke omalundilo oo a ninga moshiwana,”
Emvula kakwa li a hala okupopya osho omupedu pelesidente waye a popya moshiwana.

“Ino kala wa fa uheshi shi shaashi oshifokundaneki sheni osho kwa li sha pitifa eenghundana odo,” Osho a ti ngaho.

Seibeb ina monika opo a tye ko sha. Omupedu pelesidente nale okwa li a tya ekwatafano lavo naSwartbooi kali li nawa.
Ashike nee, Swartbooi okwaanya omapopyo kutya ongudu otai topoka.

“LPM kai na fiku i teke po, kutya nee omunhu ota kondjifa shi fike peni. Otu li ashike ponghatu yokuya pombada,” Osho a ti ngaho.

NINGULULA OMAPOPYO OYE

Elelo longudu otali pula opo Seibeb a ningulule omapopyo aye oo kwa li a popya koikundaneki.

Simaata Omaandaxa okwa ti hamushanga woLPM okwa li a lombwela Seibeb opo a ningulule omapopyo aye oo kwa li a popya eheshi oshili.
“Shaashi oipupulu kombinga yongudu filufilu,” Simataa osho a ti ngaho

Ongudu oya teelela Seibeb a nyamukule omanga inai ninga omatokolo kombinga yomakonaakono ile onghatu yonumba, osho a ti ngaho.
Simaata okwa ti vali Seibeb okwaanya okupopya nomulopoti woshifokundaneki shimwe.

Eshi a pulwa ngee Seibeb ota ka kufwa mo mopaliamente okwa ti inaku kufwa nande omatokolo eli ngaho.