Hamushangandjai woSwapo Sophia Shaningwa okwa ti ongudu itai dulu okuninga oshoongalele osho shi na okuhoolola pelesidente wongudu shaashi kai na oshimalwa.
Oshinima eshi okwe shi popya momukanda oo a yandja komhangu yopombada.
Swapo okwa yandja omukanda komhangu opo a popile etokolo laye lokuhaninga oshoongalele ku hoololwe pelesidente wongudu.
Ongudu inai kala i na pelesidente okudja ngaa muFebuluali, sha landula efyo lapelesidente Hage Geingob.
“Ongudu okwa li ya yandja oshimaliwa shihapu pefimbo loyoongalele yopaitopolwa momudo 2023,” Osho a ti ngaho.
Okwa ti eshi itashi ningwa ashike shaashi pelesidente Hage Geingob a xulifa ashike nande ngeno hasho sha li ngaho ngeno oshinima eshi inashi ningwa mo momudo 2024 aushe nosho yo ombinga imwe yomudo 2025.
Shaningwa okwa weda po vali kutya oimaliwa imwe okwa li ya longifwa mokutunga ombelewa yakula yoSwapo.
“Ongudu oya pumbwa oshimaliwa shoikonga yayo yomahoololo nosho yo okuninga oshoongalele osho tashi ka hoolola ovanhu ovo tava ka ya mopaliamente,” Osho a ti ngaho.
Eshi osha shikula onghatu yopaveta oyo ya kufwa koilyo yongudu Reinhold Shipwikineni, Peter Shituula, Joshua-Vaino Martins navakwao vamwe, ovo va pula oSwapo shi ningi oshoongalele shokuhoolola pelesidente wongudu.
Shaningwa okwa ti itashi shiva kuningwa oshoongalele osho.
Ongudu otai ka ninga oshoongalele shayo shokuhoolola pelesidente muApilili 2025.
MuMarsa, Netumbo Nandi-Ndaitwah okwa li a kolekwa a ninge okandidate koSwapo oko taka ka kalela po ongudu momahoololo oupelesidente, puhe na oshoongalele sha ningwa, kongudu mutima.
Oilyo imwe yongudu oya ti oshinima osho osha teya ekotamhango longudu ndee tai pula opo ku ningwe oshoongalele osho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
