SPYL i indile epangelo li gwedhele omasiku gokushangitha uukalata

KOMUNUTE GWA HUGUNINA … Aakwashigwana oyendji otaya mbombolokele kiitayi yomahanganokwatakanithi goongodhi moshilongo opo ya shilipaleke kutya uukalata wawo woongodhi inawu tetwa mombepo. Okushangitha uukalata okwa tamekele muJanuali numvo nesiku lya hugunina omasiku 31 Desemba. Ethano: MICT

EWAWA lyaagundjuka moSwapo ndyoka tali ithanwa Swapo Party Youth League (SPYL), olyi indile Uuministili wOmauyelele nOmakwatathano gOpaungomba wu gwedhele omasiku gokushangitha uukalata woongodhi, noomwedhi 12 dha gwedhwa po.

Mombapila ndjoka amushangandjayi gwewawa lyaagundjuka moSwapo, Ephraim Nekongo, a tumine minista gwomauyelele Peya Mushelenga oshiwike sha zi ko, okwa popi kutya omahanganokwatakanithi goongodhi moshilongo oga yama kepangelo naashoka otashi ti kutya ohaga eta mo iiyemo mepangelo, nonkene ngele uukalata owa tetwa mo mombepo otashi ke eta iiyemo yomahangano ngoka yi shune pevi.

Esiku lya hugunina lyokushangitha uukalata womoongodhi olyi li popepi naakwashigwana oyendji moshilongo otaya mbombolokele kiitayi yomahangano gomakwatakanithi goongodhi dhopeke opo ya shangithe uukalata wawo. Okwiishangitha uukalata okwa tamekele muJanuali numvo nesiku lya hugunina omasiku 31 Desemba, nongele okatetwa mombepo nena omuntu ota pewa ethimbo lya ngambekwa opo e ka shangithe nongele hasho otashi vulika a kanithe thilu onomola ye yongodhi, yo yi ka gandjwe po komuntu gulwe monakuyiwa.

“Uulethimbo wa gandjwa tango wokushangitha uukalata koshikondowiliki shomakwatathano moshilongo sho-Communications Regulatory Authority of Namibia (Cran) okwa li opokati komasiku 1 Januali nomasiku 31 Desemba 2023, ashike nando ongaaka omahanganokwatakanithi goongodhi ngaashi MTC ogu ulike kutya sigo oompaka olya shangitha owala aantu ye li pondjele yoopelesenda 25,” osho Nekongo a popi ngaaka.

Okwa popi kutya ngele omasiku gokushangitha uukalata oga kala inaaga gwedhelwa nena shoka otashi ti omahangano ngaashi MTC, otali kanitha ookastoma dhi li poopelesenda 75 molwashoka uukalata wawo otawu tetwa mombepo.

“Onkene, otatu indile Uuministili wOmauyelele nOmakwatathano gOpaungomba wu gandje elombwelo koCran opo omasiku gokushangitha uukalata ga gwedhelwe noomwedhi 12 dha gwedhwa po,” osho a popi ngaaka.

“Omahangano gaali gomakwatathano gopangodhi ga yama kepangelo ohaga eta mo oshimaliwa sha kola okupitila melanditho lyethimbo lyokongodhi osho wo ethimbo lyokuya komalungula. Ngele oopelesenda 75 dhuukalata woongodhi woMTC owa tetwa mombepo, otashi ke eta ehangano ndyoka lya yama kepangelo li tameke okushongola nonande okwa li hali e ta mo oshimaliwa,” osho Nekongo a popi ngaaka.

Okwa popi kutya okuteta mombepo uukalata itaku gumu owala omahanganokwatakanithi ga yama kepangelo (MTC naTelecom), ashike otashi vulika shi ka gume nayi omahupilo moshilongo.

Nekongo okwi indile MTC naTelecom ya ninge oonkambadhala dhokutumina aanambelewa yawo kiikandjohogololo ayihe 121 moshilongo opo ku shilipalekwe kutya aakwashigwana oya shangitha uukalata wawo unene tuu komikunda sho shi shunithe pevi omwaalu gwomangundumano ngoka ga kaalela iitayi yomahanganokwatakanithi moondolopa.

Oshiwike sha zi ko, Omukuluntuwiliki gUuministili wOmauyelele nOmakwatathano gOpaungomba, Audrin Mathe, okwa lombwele iikundaneki kutya omasiku gokushangitha uukalata woongodhi itaga gwedhelwa molwashoka Aanamibia oye na onkalondjigilile yokuninga iinima komunute gwa hugunina.

“Sigo oompaka Aanamibia ye li poopelesenda 45 oye shi pondola okushangitha uukalata wawo, onkene okuna natango oopelesenda 55 dha hupa ko,” osho Mathe a popi ngaaka.

“Onkalo ndjoka ohayi holoka molwashoka Aanamibia oye na onkalondjigilile yokwiinyenga uuna ethimbo lya pwa ko,” osho a gwedha po ngaaka.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!