Ehangano lokuungaunga noiponga yomeendjila ledina Motor Vehicles Accident (MVA) Fund ohali yandje oshimaliwa shi fike peemiliyona di li N$325 komudo keshe, omo eemiliyona di li lwopoN$200 hadi longifwa mouhaku woihakanwa yoiponga yomeendjila, omukulunhuwiliki woMVA Fund Rosalia Martins-Hausiku osho a ti ngaho.
Martins-Hausiku okwa ti elongifo loshimaliwa loshikefa eshi otali ulike omukundu weameno meendjila daNamibia nosho yo omumbwe yoshimaliwa shokukelela mosystema youndjolowele.
“Oimaliwa imwe ei ohai dulu okuya i ka lande oikwa nopangifo yomoipangelo oyo ya pumbiwa,” osho a ti ngaho, ta weda po kutya oshinima eshi otashi xwepopeke oshilongo shi dule okuyakula nokuxunga omwenyo oonakuningwa oihakanwa nawa.
Eshi kwa li ta popi novanhu ovo kwa li va holoka koshoongalele shokomudo sheameno lomeendjila koSwakopmund, Martins Hausiku okwa yeleka kutya elalakano loshikefa kali fi ashike okufuta ovanhu, ashike ola tala yoo komayakulo omaxungomwenyo efimbo lile, okwaalula efimano lomunhu nomahongo eameno loshiwana.
“Oilonga yetu oya pita po pokuyandja omauwa; oyokuxupifa eemwenyo, okwaalula ongushu yomunhu nokukufa ombinga yeyambulepo lopashiwana,” osho a ti ngaho.
Namibia ota twikile nokudidilika omafyo omeendjila taa i pombada, movanhu 100 000 mu na omafyo e li 13.8 neudo omangha momudo 2024 kwa li e li 11.3.
Nande omwaalu waavo va mona oiponga owa shuna pedu kashona po145.2 movanhu ve li 100 000, ehangano ola didilika kutya oupyakadi wopanghalafano nopaliko natango ou li pombada.
“Edi kadi fi ashike omivalu dongaho; oda kalela po ovanhu voshili, Ovanamibia ovo eendjodi davo nomahalo a tetwilwa,” Martins-Hausiku osho a ti ngaho.
Okwa weda po kutya oiponga ihapu ohai etwa koinima tai dulu okukelelwa ngaashi okushingilila sha pitilila, eloloko nokushinga omunhu e li koshi yodungo.
Okwa ti ehangano otali longelekumwe nomahangano okukwatela po oveta, omalelo eedoolopa nomandiki omahongo mokuxwaxwameka elongifo leendjila la amenwa okupitila meepolohalama domahongo nenghonopeko lomauyelele.
Marttins-Hausiku natango okwa yeleka eenghendabala dehangano dokulongifa omalungula opo omayakulo a dule okumonika noupu nokuyambula po yoo elongo lopauyelele.
“Omalongelokumwe ape noiputudilo ngaashi Namibia University of Science and Technology noMobile Telecommunications Limited otaa lalakanene okulongifa oungoba noinima ipe momahongo oshiwana okulongifa eendjila momikalo da amenwa.
Ngee aishe ya dopa, otu na okutota omudingonoko tau dimine po nokunyamukula,” osho a ti ngaho.
Natango, omunashipundi wonguduwiliki yehangano lopashiwana leameno lomeendjila Eliphas !Owos-oab okwa ti eyokomesho mokushonopeka oiponga yomeendjila otali imbwa keeveta dikulu da nghundipala.
Okwa ti ongongahangano otai twikile nokulonga i li koshi yokatendo koNational Road Safety komudo 1972, oko kehe na eeveta da pumbiwa di uungaunga nomikundu doshinanena ngaashi okutula mumwe omauyelele, okunghonopeka elongelokumwe nehongo loshiwana.
“Ongongahangano otai twikile nokulonga i li koshi yokatendo konale koNational Road Safety komudo 1972, oko kehe na oinima aishe ya pumbiwa yokuungaunga nomikundu doshinanena,” osho a ti ngaho.
!Owos-oab okwa indila epangelo opo li endelelife onotwaveta yokuwilika eameno lomeendjila li nghonopeke ewiliko noufemba aushe li longe oilonga yalo nawa.
-the BRIEF
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
