OMUNANGESHEFA gwongeshefa yoondhopi pOshikuku, Sackey Shimwandi nomukalimo gwomOshikandjohogololo sha Etayi mOmusati, oshiwike sha zi ko, okwa gandja oondhopi eyovi limwe dhongushu yooN$3000 kEhangano lyAanuulema mOshikandjohogololo sha Etayi.
Oondhopi ndhika odha pewa omunashipundi gwEhangano lyAanuulema mo Etayi, tate Gabes Amukoshi, sha ningilwa pongeshefa yoondhopi ya tate Shimwandi pOshikuku,yedhina Omwandi Trading Enterprises CC. Kaansela gwEtayi, Bernadinus Shekutamba Shikongo naye opo a li poshituthi shegandjo lyoondhopi ndhika, pamwe naawiliki ye yamwe yomoshikandjohogololo.
Shimwandi ta hokolola ta ti,okampani ye yokuninga oondhopi oya tokola okugandja omagano ngaka kehangano lyaanuulema mwEtayi molwa shoka aanuulema yaamoka oya tokola ya tunge po etungo lyawo lyokulongelamo iinima yawo, ngashi okutula mo oprojeka yawo yokuhondja noshowo ongalashe yokupangela uutemba wawo wokweenditha, okufikila, okulonga iipilangi, okupangela oongaku nosho tuu.
Shimwandi ta holola wo kutya, kakele kokampani yawo, opu na wo aanangeshefa yamwe ya gandja wo oondhopi kEhangano lyaanuulema ndika. Ta ti omunangeshefa, Lazarus Emvula (California) okwe ya pa omagano goorama dhomakende dhongushu yooN$800. Let us Push bar, te ya pe oondhopi omathele gaali dhongushu yooN$600, T.M. Enterprises te ya pe oondhopi ethele limwe dhongushu yooN$300, Namibia Funeral Suppliers te ya pe oondhopi 200 dhongushu yooN$600. Ngele owe yi tula kumwe ayihe ya gandjwa otayi ku eta pongushu yooN$5300 lwaampoka.
Kaansela Shekutaamba, okwa pandula noonkondo, Shimwandi, ngoka e li gumwe gwomongundu yeyambulopo lyoshikandjohogololo shEtayi, naanangeshefa yakwawo sho ya dhimbulukwa aanuulema ngeyi noku ya pa omagano goondhopi ya ka tamekithe netungo lyawo lyokuningila mo Ooprojeka dhawo.Omunashipundi gwEhangano lyAanuulema moshikandjohogololo sha Etayi, Gabes Amukoshi, okwa pandula noonkondo, Shimwandi naanangeshefa yakwawo sho ye ya kwathela ngeyi. Ta ti oondhopi ndhoka noorama dhomakende otayi ka longithwa naanaa ngashi ya nuninwa.
Kaansela Shikongo, ta indile kaanageshefa nokoshigwana ashihe sha Namibia, unene tuu shoka shomu Etayi nomoNooli, shi kwathele aantu mbaka molwashoka oya tokola okwiikwatha.
