Shaningwa okwa ti inava vatelwa nande oshimaliwa shomahoololo kOvachina

Hamushangandjai woSwapo Sophia Shaningwa, okwa ti kapu na nande oshinima sha nyika oumbudi kombinga yetalelepo laye koChina, eshi okwe shi popya molwomapopyo oo taa ti okwa li ta kongo evatelo loshimaliwa kongudu yedina Communist Party of China (CPC) opo shi vatele ongudu tai pangele meekambaina domahoololo oo e li ko muNovemba.

Swapo noCPC eengudu de lifa nodina omutungilo wa faafana nongudu ei yokoChina oya kala nokutalela po ongudu yoSwapo monakudiwa.

Eengudu edi oda itavela momukalo welelo loufikepamwe pamaxupilo noda kala nokulongela kumwe okudja ngaa pekondjelo manguluko.

“Onda hala okushiyeleka nawa kutya ekwatafano lopavali lopapolotika olo li li pokati koSwapo nongudu yoCommunistist Party of China opo la kala okudja ashike efiku lotete lemanguluko. Oshinina oshi na okukala tashi twikile opo eengudu edi mbali di kale nokulivatela fiyo pa holoka sha pokati ketu,” Shaningwa osho a ti ngaho eshi a dja koChina Olomakaya.

Okwa ti oshoongalele shavo noCPC okwa li shi na sha nopolotika noikundafanwa imwe ya kunda fanwa ongaashi okudeula ovaleleli vovanyasha voSwapo, moikondo ya yooloka ngaashi oungoba wopaunamapya neetundi dixupi dopolotika koilyo yongudu mutima yoSwapo.

“Omatalelepo pokati kelelo loSwapo noCPC ohaa eta opo tu lilongele kuvakwetu nokunghonopaleka ekwatafano pokati keengudu detu edi,” Shaningwa osho a ti ngaho.

Eengudu edi oda kwatela mo oCPC, People’s Movement for the Liberation of Angola, Chama Cha Mapinduzi of Tanzania, Communist Party of Cuba, Communist Party of Russian Federation, United Russia, African National Congress of South Africa, Frelimo of Mozambique noZimbambwe African National Union-Patriotic Front, osho a ti ngaho. “Ongahamushangandjai, ohandi endele pamwe nefimbo, kandi shi ashike omunapolotika ashike onda hala nexumo komesho lounyuni,” Shaningwa osho a ti ngaho. Shaningwa okwe likala kutya omunangeshefa akula waChina Stina Wu okwa li umwe womosheendo shavo shokoChina. Natango okwa ti etalelepo laye lokoChina kakwa li li na sha nokulongela kumwe paholamo nokakomisi komahoololo kedina Electoral Commission of Namibia (ECN), opo ka ninge oumbapila vomahoololo vopaumbudi voo va dule okweenda omukalo woudemokoli pomunghulo muNovemba odula ei.

“Swapo ongudu ya fimaneka oveta noi na okulandula omilandu odo da tulwa po mokunduluka, okutukula nokukoleka oumbapila ovo veengudu adishe momukalo oo uwa inau patela nande omukufimbi umwe kondje,” Shaningwa osho a ti ngaho.

Okwa twikila vali ndee ta ti, ongudu yaye oyo kwa li a ya nayo okwa li ashike ina oilyo yongudu mutima yoSwapo oyo i li koshi yombelewa yaye noshilyo shimwe shopolitburo. “Natango, okakomisi komahoololo kaNamibia okaanya omapopyo kutya omukulunhuwiliki wako, Peter Shaama, okwa li umwe vomwaavo kwa li va ya naShaningwa koChina.

“Okakomisi okaanya oshinima eshi. Kashi li mondjila nandenande, osha nyika oshiponga nosha tandavelekwa,” Omukanda woECN osho wa ti ngaho Oshoondaxa. Natango okakomisi komahoololo oka ti ohaka longo paumwene. “Onghee nee, ohatu pula oshiwana opo shi likaleke kokule nokutandaveleka omauyelele ehe li mondjila woo aa nyika oshiponga oo taa dulu okweeta omalipulo kombinga youshili wokomisi yomahoololo momahoololo opashiwana noupelesidente oo twa taalela. Natu twikileni nokuyambula po eenghedi diwa doudemokoli moNamibia,” ECN osho a ti ngaho.