Shaningwa i indile aakwaSwapo ya simaneke omaiyuvo ga yooloka

AMUSHANGANDJAYI gwoSwapo, Sophia Shaningwa okwi indile iilyo yongundu yawo yi simaneke nokutaamba ko omaiyuvo ga yooloka ngoka taga gandjwa kiilyo mongundu.
Shaningwa ndhoka okwe dhi popi pethimbo a tamekitha ekotampango lyewawa lyaakiintu mongundu yoSwapo ndyoka lya gwedha omalunduluko, sha ningwa mEtine lya zi ko mondolopa yaMuthiya, moshitopolwa shaShikoto.

“Natu kale tatu vulu okutaamba ko omaiyuvo ga yooloka okuza kookamarada osho wo okumona eyamukulo lyopamuhanga ndyoka lyi li muuwanawa wuukumwe nehumokomeho mongundu, momakotampango getu nomoodokumente dhomilandu ndhoka dha totwa po monakuziwa,” osho Shaningwa a popi ngaaka.

Okwa popi kutya uuyuni aluhe otawu lunduluka, nonkene opolitika nayo otayi ya omalunduluko.

“Onkene natu tsikile nokutalulula omakotampango getu osho wo oodokumente dhetu dhomilandu opo dhi vule okukala mewi limwe nomidhingoloko osho wo omashongo ngoka ge li mopolitika yongashingeyi,” osho a popi ngaaka.

Shaningwa okwa popi kutya momutumba gwoSwapo ngoka gwa li ko muNovemba omumvo gwa zi ko mOvenduka, okwa ziminwa mekotampango lyewawa lyaakiintu moSwapo mu ningwe omalunduluko opo ga kale momuhingo gumwe nooveta ndhoka dhi li mekotampango lyoSwapo.

Okwa popi kutya okatendo 49 (1) mekotampango lyoSwapo oka gandja opo pu totwe olaata yaakiintu moSwapo.

“Shoka otashi ulike kutya ongundu yoSwapo onkene yi itula mo okumangulula aakiintu,” osho Shaningwa a popi ngaaka.

Okwa popi kutya ongundu yawo oye eta po uuthikepamwe wo50/50 mokukalela po ongundu miitayi osho wo momitungilo adhihe dhongundu ngaashi naanaa tashi uthwa kekotampango lyongundu osho wo moodokumente dhomilandu.

“Shoka osha gandja aalumentu naakiintu ompito yithike pamwe okumona oonkatu nokuya momitungilo dhongundu yoSwapo,” osho a gwedha po ngaaka.

Pauyelele wa gandjwa kuShaningwa, okatendo 49(3) kEkotampango lyoSwapo oka gandja uuthemba kewawa lyaakiintu moSwapo ya kale nekotampango lyawo ndyoka tali ya wilike.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.