Shanghala okwa ti ovafeekelwa moshibofashoFishrot itave liumbatelwa she lifa

Ovafeekelwa moshibofa shoFishrot itave liumbatelwa she lifa, minista wouyuki mukulu nokwa li haendendjai Sacky Shanghala osho a ti ngaho.

Shanghala omapopyo aa okwe a ninga momukandaano oo wa yandjwa komhangu yopombada tau yambidida eindilo lovafeekelwa vatatu moshibofa shoFishrot va tameke oihokolola puhe na ovafeekelwa pamwe navo.

Shanghala, nomunashipundi mukulu wehangano ledina Fishing Corporation of Namibia (Fishcor) James Hatuikulipi naPius Mwatelulo okwa li va ninga eindilo opo oihokolola yavo i li ningilwe kwaayo yavakwao vamwe pexulilo loshivike sha dja ko.

Ngee okwa ningwa oihokolala ya yooloka otashi vatele opo Shanghala, Hatuikulipi naMwatelulo opo va mone oihokolola i li pauyuki konima va mona ovakalelipo vopaveta notashi vatele epangelo nosho yo ovafeekelwa pamwe navo moshikumungu omu va ye komesho noihokolola yavo i lilile puhe na omapiyaaneko asha, Shanghala osho a ti ngaho momukanda waye oo a yandja komhangu.

Shanghala, Hatuikulipi naMwatelulo ova kala vehe na ovakalelipo vopaveta okudja odula ya dja ko muDesemba, konima eshi kwa li itava dulu okwoongela oimaliwa va fute ovakalelipo vopaveta ovo kwa li ve va kalela po okudja ngaa eshi kwa li va mangwa po muNovemba 2019 opo ve va kalele po pefimbo loihokolola yavo.

Momukanda waye , Shangahla okwa kala nokweendulula oitwa ihapu oyo kwa li a popya pefimbo kwa li ta popi nomhupanguli wopakafimbo MosesCinhengo muDesemba odula yandja ko, omanga omhupanguli kwa li ina yandja elombwelo kutya oihokolola kombinga yoshikumungu eshi nai tameke.

Shanghala okwa ti yee, Hatuikulipi naMwatelulo itava dulu okupewa ombedi molwonghalo oyo ve li muyo vehe na ovakalelipo vopaveta ve va kalele po.

Elombwelo lokukufa ko omaliko avo okwa li la yandjwa komhangu yopombada momudo 2020 kwa longifwa otendo kokukelela oimbuluma ya longekidwa, ndee oshinima eshi osha kuma nai omaliko avo aeshe, Shanghala osho a ti ngaho.

Ovafeekelwa pamwe navo vamwe mwa kwatelwa omukulunhuwiliki mukulu woFishcor Mike Nghipunya, Oneel Shuudifonya naMwapopi, ova kala tave liumbatelwa sha yooloka nonghee nee inava kumwa nande koshinima osho shomaliko e li momake epangelo, Shanghala osho a weda ko ngaho.

Nghipunya, Shuudifonya naMwapopi, ovo va kalelwa po kuhaende Milton Engelbrecht, ova popya kutya ove lilongekidila oihokolola i tameke, notashi dulika vaha pewe oufemba woihokolola ya endelela ngee yee, Hatuikulipi naMwatelulo ova kendabala va mweneke oihokolola omanga vehe na ovakalelipo, Shanghala osho a ti ngaho.

Puhe na ovakalelipo vopaveta, Shanghala, Hatuikulipi naMwatelulo inava kala tava dulu okuya komesho noihokolola yopetameko, kakele ashike kokupopya kutya kave na ondjo ile ove na ondjo kombinga yoinima imwe oyo tava tamanekelwa, osho a ti ngaho natango.

Ngee inaku yandjwa oufemba kutamekwe oihokolola naavo ve lilongekida ashike ndee opuwo, nena oufemba wokweendelelifa oihokolola opo ovanhu va mone oihokolola yopauyuki, nena ovafeekelwa ovo ve na ovakalelipo vopaveta otava mono ouwa shi dulife ovo vehe na ovakalelipo vopaveta, Shanghala osho a ti ngaho.

Chinhengo Etivali okwa li oshibofa eshi undulila mEtitatu, konima eshi kwa li a lombwelwa kutya omufeekelwa wotete moshikumungu omu, Ricardo

Gustavo, oo aha li mo momhangu pefimbo opo okwa li a kwatelwa moshipangelo oshivike sha dja ko, okwa li kwa teelelwa a lekelwe Etivali.

Okwa ti okwe lilongekida okuungaunga neindilo lokuninga oihokolola pefimbo la yooloka ngaashi tashi dulika, Chinhengo osho a ti.