Ngoka a li mayola gwondolopa yaNgwediva, Taarah Shalyefu okwa tongonona uusama mboka tawu pewa omupresitente Netumbo Nandi-Ndaitwah sho u ulike omupambele gwe, Chris Nghaamwa, ongomugandjimayele gwahahendendjayi Festus Mbandeka, “ongoshinima showala”.
Oshiwike sha zi ko, Nandi-Ndaitwah okuulike Nghaamwa (62) ponkatu ya tumbulwa pombanda, naashoka osha ningwa pwaana etseyitho moshigwana.
Moonkundathana nonzonkundaneki ndjika, Shalyefu okwa popi kutya ke wete sha puka ngele omupresitente okuulika omupambele gwe a adha iipumbiwa nokwapyokoka miilonga yonkatu ndjoka a pewa.
“Otandi tsikile noku shi tya kutya shoka oshinima showala, Ngu a popi kutya ngele owa pamba omupresitente nowa adha iipumbiwa, iilonga ino yi pewa olye?,” osho a pula ngaaka okuyamukula kwaamboka ye li ompinge nasho.
Shalyefu, ngoka wo nokuli e li omusita omukuluntu mongeleka ya-Anglican, okwa popi kutya egandjo lyuusama ohali tala owala kiinima ya nathangwa peha lyokutumbaleka omupresitente omolwiilongapondoli mbyoka a longo sigo oompaka okuza sho a yi koshipundi.
“Opuna iinima oyindji mbyoka omupresitente a pondola okuza sho a yi mombelewa, ashike aatondi ye oya tala owala kiinima ya nathangwa,” osho a popi ngaaka.
Petameko lyoshiwike shika omupopiliko gwegumbo lyepangelo Jonas Mbambo okwa koleke kutya Ngaamwa okuulikwa komupresitente nokwa tameke iilonga ye ongomugandjimayele mOmbelewa yaHahendendjayi okuza momasiku 1 Juni.
“Omauliko gaagandjimayele ohaga ningwa paKotampango nokohi yoveta, shi ikwatelela koompumbwe niipumbiwa yomayakulo goshigwana, taku taliwa kontseyo, osho wo kuunongo womuntu ngoka tu ulikwa,” osho Mbambo a popi ngaaka.
Inashi tseyika kutya omolwashike euliko lyaNghaamwa inaali tseyithwa moshigwana ngaashi shi li onkalondjigilile yaamboka taya ulikwa poonkatu komupresitente.Nghaamwa okwa li u ulikwa ongomunambelewa omukuluntu gwiikwaveta mombelewa yahahendendjayi mo2009.
Nokwa yi moshipundi shevululuko muJuni 2024, ashike okwa galulilwa mOmbelewa yaHahendendjayi konima owala yoomwedhi ndatu sho a yi mopenzela.
Mo2017, Nghaamwa oye gumwe gwomaanambelewa aakuluntu mepangelo mboka kwa li taya tamanekelwa uuhasha, nokundopa okugamenenapo epangelo osho wo okulonga muuwanawa wepangelo omolwedhanonkandangala lyawo moshikumungu shompungulilo yomahooli yoobiliyona N$5.5.
Nghaamwa kali nande a monika ondjo moshikumungu shoka, konima sho a holoka miihokolola yomaihumbatonayi gomiilonga.
Oshiwike shika, omupresitente gwongundu yompilameno yo-Popular Democratic Movement, McHenry Venaani, okwa nyana euliko lyaNghaamwa ponkatu ndjoka, nokupopya kutya omupresitente okwa kutha oonkatu “dhesithahoni” tadhi dhinitha einekelo muuleli.
“Omukalo ngoka ogwa puka noonkondo okuulika aapambele ye nenge aantu yomuhoko gwe moonkatu konyala adhihe oonene [mepangelo].
Ota gandja etumwalaka moshilongo, tali ti: kala omupopepi nangame, omuKwanyama, niilonga otayi kala yoye,” osho Venaani a popi ngaaka.
