Minista woimaliwa Ericah Shafudah, okwa ti oveta yokuwilika omahangano oimaliwa nokukwashilipaleka kutya otaa longo mouwa woshiwana yedina Financial Institution and Markets Act (Fima), oi li mouwa wovakwashiwana, eengeshefa novanhu vokondje yoshilongo ovo va hala okukufa ombinga meliko loshilongo.
Omanga yoo tai pitike epangelo li nghonopeke okuwilika nokuxwepopeka omafaneko opaliko.
Shafudah eendaka edi okwe di popya pepatululo lokatendo aka pambelewa mOvenduka Etitatu.
“Fima okwa pingena po omulandu wopaveta u kulukulu.
Omulandu ou wopaveta otau yandje oinima aishe oyo ovawiliki vetu va pumbwa va amene oshikondo shoimaliwa, omanga yoo tai toto eenghalo omo eduto loinima neyambukepo tali i komesho nawa,” osho a ti ngaho.
Oveta okwa li ya pitifwa momudo 2021 noye ya moilonga mulotete laMei neudo.
Otai xwepopeke oshikondo shokumbaanga shaNamibia nokutula mumwe eeveta dikulu di na sha nomahangano oimaliwa.
Shafudah okwa ti kutya elalakano loveta ei okukwashilipaleka onghalo yoshimaliwa i li xwepo, ekwatelemo lopashimaliwa nokwaamena ovayakulwa.
Pakuxwepopeka eenghono dovawiliki, Fima ota amene oshikondo shoimaliwa aishe, osho a ti ngaho.
“Otai amene eependjela noimaliwa oyo ya tuvikilwa ndee unene unene otai amene omaxupilo ovakwashiwana vaNamibia,” osho a ti ngaho.
Minista okwa ti vali eameno lovayakulwa ola kwatelwa mo moveta, osho tashi tungu po elineekelo pokati kovayakulwa noshikondo shoimaliwa.
Eshi okatendo kwa li ka pitifwa, okwa li kwa hololwa omalimbililo a mana mo koshiwana, omahangano oshimaliwa nomahangano ngaashi opaipindi kombinga yomilandu dopendjela moveta.
Okwa li kwa hololwa omalimbililo kondadalunde kombinga yokutuvikila oimaliwa yopendjela.
Omulandu upe paife otau pitike oilyo yoshikefa sheependjela i kufe ko eepelesenda di li o-25 koimaliwa yayo manga inai wanifa omido 55.
“Nena onda hala okuyela kutya omanyenyeto Ovanamibia kombinga yomulandu woRF.R.5.10 aa udika nokwa kalekwa manga,” Shafudah ta ti.
Minista natango okwa pula yoo ovakufimbinga aveshe moshikondo opo va yambidide ehangano loNamibia Financial Institutions Supervisory Authority (Namfisa), eshi tali tula moilonga oveta ipe.
