MUGUNDJUKA gwomimvo 18 nomukalimo moShomeya oye omuthaneki dhingi gwoshilongomwa shiikwa ulyenge nuulinga nuumvo.
Richard Lee Schoombe okwa sindanapo oshishani shika ongo omusindani kombanda yaayehe mokuthaneka nokweetapo ombandi yuutanga utatu woshingoli shongushu yookarata 18, ndjoka ya humbata uuwe wa hongwa wuli 1 361, wondjundo yookarata 38,64. Schoombe okwa li a kuthombinga methigathano lyoku thaneka iikwa malyenge nuulinga hali wilikwa kehangano lyokulanditha okawe lya Namibia lyedhina Namibia Diamond Trading Company. Omathigathano ngaka gonuumvo oga li ga taamba aaishangithi ayehe kumwe yeli 60 mboka ya kuthombinga.Ota ku tiwa mboka yonuumvo oyendji ye vule mbeyaka yiishangithile omimvo ndatu dha opiti. NDTC okwa li a ningi oshituthi shegandjo lyomapapa kwaamboka ya thaneke iilongomwa yoludhi nduka oshiwike sha yi moVenduka. Omapapa ngoka ohaga gandjwa kohi yedhina Shining Light Jewellery Design Competition. Elalakano lyaashika olyo oku pa aanamibia ompito yoku ulika oontseyo yawo yoku thaneka iikwamalyenge nuulinga noshowo okupapudhula ohokwe muyo opo yi ilonge iilonga yokulonga noshingolo niitenda yilwe yuu yamba. Ethigathano ndikaolyo oshitopolwa shehangano lyokuthaneka muumbugantu wa Africa moka iilongo ngaashi South AFRICA, Botswana na Namibia ha ya kuthombinga. Shika ohashi ningwa opo uuyuni wu ulikilwe kutya muumbugantu wAfrica namo omuna aanawino yoku teta nokuthaneka iikwamalyenge nuulinga kamana.
