Schlettwein i indile oonakuyaka po oopomba dhomeya ya tulwe miipandeko

Minista guunamapya nuuniimuna, omeya netendululo lyevi Calle Schlettwein okwi indile oshigwana shi dhane onkandangala mokupopya aantu mboka taya yaka po oopomba dhomeya koomboola opo ya taalele oveta.

Minista okwa popi kutya omumvo kehe uuministili ohawu kondjo mpoka tawu vulu, nokamaliwa hoka ke li po, opo wu shilipaleke kutya owa thikitha omeya komikunda hoka ku na aakwashigwana niimuna tayi si kenota, ashike mbala konima pwa tulwa oopomba ndhoka onkundana ohayi ya kutya odha yakwa po.

“Otwa pumbwa okukwata aafuthi mboka opo tu longe nayo. Naashoka otatu shi pondola owala uuna twa longeleni kumwe,” osho minista a popi ngaaka.

Schlettwein ndhoka okwe dhi popi pethimbo lyegandjo pambelewa lyehala lyaaniimuna lyedhina Amarika Farmers’ Cooperative momukunda Olumpelengwa moshikandjohogololo shaKahao, moshitopolwa shaMusati, oshiwike sha zi ko.

Okwa popi kutya eyako lyoopomba dhomeya oshinima shoka sha guma oshilongo ashihe.

Omukuluntuwiliki muuministili mboka Ndiyakupi Nghituwamata okwa popi kutya sigo oompaka oopomba dhomeya dhi li 120 odha yakwa po miitopolwa ya yooloka moshilongo.

“Shoka otashi ulike kutya kapu na eitulemo lyokupandula oopomba ndhoka tadhi tulilwa po aakwashigwana. Itandi vulu oku shi itayela uuna omboola yi li popepi negumbo momukunda, yi na opomba nolusheno lwoketango ndele onkene tayi yakwa po komuntu teya po neshina lyokuteta ko opomba kaapu na ngoka u uva sha.

Shoka ngame itandi shi itayele,” osho minista a popi ngaaka.

Schlettwein okwa popi kutya aakwashigwana oya pumbwa okulongelakumwe opo ku keelelwe eyako lyoopomba dhomeya poomboola.

Okwa popi kutya okwe eta po iikwaniipangitho yomeya oshinima shoka shi na ondilo noonkondo, nokwa popi kutya ngele aakwashigwana oye etelwa omeya pomudhingoloko ndele otaya etha oopomba dhi yonagulwe po omolwuuhasha wawo nena uuministili otawu pilamene ko nokufala oopomba dhomeya komikunda ndhoka inaa dhi pewa natango uuwanawa womeya.
“Itatu kala tatu galuka ethimbo kehe medhina lyaakwashigwana mboka inaaya hala okusa oshimpwiyu shokukaleka po iinima yawo. Mboka uupyakadhi uunene,” osho a popi ngaaka.

EYAKO LYOOPOMBA

Ashike nando ongaaka, onzonkundaneki ndjika oya tseyithilwa kutya yamwe yomwaamboka taya yaka po oopomba dhomeya poomboola ngaashi moshitopolwa shaMusati, aanambelewa mboka haya longele Uuministili wUunamapya nUuniimuna, Omeya nEtendululo lyEvi.

Omupopiliko guuministili mboka, Jona Musheko okwa lombwele onzonkundaneki ndjika omwedhi gwa zi ko kutya poomboola 13 opwa yakwa oopomba dhomeya dhi li 13 opamwe nomalusheno goketango ga hamano, sha ningwa moshitopolwa shaKunene.

Okwa popi kutya eyako lyoopomba nomalusheno ngoka goketango otayi tengenekelwa kumwe poshimaliwa shooN$822 000.
Omwedhi gwa zi ko, onzonkundaneki ndjika oya kundaneke kombinga yaakwashigwana yomiitopolwa ngaashi shaHangwena, shaKavango Uuzilo naKavango Uuninginino ya thigwa nenota sho oopomba dhi li 46 dha yakwa po.

Pethimbo ndyoka, Musheko okwa popi kutya oopomba 43 dha gwedhwa po dhongushu yoomiliyona N$1,9 odha yakwa po miitopolwa iyali yaKavango moka oopomba 25 dha yakwa moshitopolwa shaKavango Uuninginino omanga oopomba 18 odha yakwa moshitopolwa shaKavango Uuzilo.

Musheko okwa popi kutya iikandjohogololo mbyoka ya gumwa moshitopolwa shaKavango Uuninginino ongaashi shaNcuncini, shaKapako, shaNcamangoro osho wo shaMpungu.

Moshitopolwa shaKavango Uuzilo, iikandjohogololo mbyoka ya gumwa ongaashi shaMashare, shaNdonga-Linena, shaNdiyona, shaRundu kUushayi osho wo shaMukwe.

Okwa popi kutya oopomba ndhoka okwa li owala dha dhikwa po pokati ko2020 nonumvo.

Odhindji dhomoopomba ndhoka ohadhi longithwa poomboola dhepangelo ndhoka dha ningwa momikunda okukondjitha uupyakadhi womeya miitopolwa ya yooloka, nohadhi longitha olusheno dhoketango.

Musheko okwa popi kutya nonande aantu otaya yaka po oopomba dhomeya, onkene uuministili hawu kala noku dhi pingena po. Onzonkundaneki yoNamibian Sun omasiku ga zi ko oya kundaneke kutya ngoloneya gwoshitopolwa shaKavango Uuniningino Sirrka Ausiku, okwa popi kutya omikunda odhindji odha thigwa nenota sha landula sho oopomba ndhoka dha yakwa po.

Kansela gwoshikandjohogololo shaKongo, Lebeus Shipindo okwa lombwele onzonkundaneki ndjika omwedhi gwa zi ko kutya omikunda ndatu moshikandjohogololo shawo odha thigwa kaadhi na omeya.

“Onda hala okulondodha ookalyamupombo kutya naya kale ya kotoka, molwashoka otatu vulu oku ya tula miipandeko mbala. Onda hala wo okukunkilila oshigwana shetu shi tote po ookomitiye ndhoka tadhi kala tadhi tonatele oomboola,” osho a popi ngaaka.

Omumvo gwa zi ko, onzonkundaneki ndjika oya kundaneke kombinga yaakwashigwana ya konda po6 000 yomoshitopolwa shaKavango Uuninginino ya thigwa nenota sha landula sho oopomba dha yakwa po ndhoka dha fala omeya komikunda 13 miikandjohogololo ngaashi shaMpungu, shaNcuncuni, shaMusese, shaNcamagoro osho wo shaKapako, sha ningwa pokati kaSeptemba naKotoba omumvo gwa zi ko.

Pethimbo ndyoka, Schlettwein okwa nyana onkalo yeyako lyoopomba ndhoka okupitila kepandje lye lyokoFacebook.

“Eyako lyoopomba ndhoka nehanagulo po lyoomboola dhaayehe oshinima sha vuka notashi tsikile she ethiwa owala . . . Opolisi nayi kuthe ko oongaku,” osho a shanga ngaaka.

Oopomba ndhoka tadhi yakwa po odhepangelo nodha nuninwa okukwathela aakwashigwana niimuna yawo mboka ye li momikunda kaadhi na omeya.

Onkalo ndjoka okwa li ye eta aakwashigwana mboka ya gumwa ya longithe omeya gomomulonga nonande mboka ye li kokule nomulonga otaya mono iihuna kompumbwe yomeya.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.