… Kauandenge okwa ti Rukoro okwa nduluka okakalata koukwashilyo
Hamushangandjai mu kulu wehangono lokatanga kokeemadi moNamibia, Barry Rukoro, okwa ti hamushangandjai wongudu yoNational Unity Democratic Organisation (Nudo), Joseph Kauandenge, ota kendabala opo e mu tongole mo mongudu.
Eshi oteshi ningi shaashi okwa tila nge.
Moshinima omu omu na oukwashilyo waRukoro.
Kauandenge okwa ti Rukoro ke na okakalata koukwashilyo wongudu, onghee nee ita dulu okuya momahoololo elelo longudu.
Kauandenge okwa ti okakalata koukwashilyo wongudu oko ka ulikwa kuRukoro, ka shangwa omafiku 18 Novemba 2003 (oko oThe Namibian ya mona), ota ka dulu kukala kopaumbudi, ndee ongudu otai ningi omakonaakono opo i tale ngee okoshili ngaa.
“Natango ohatu ti otwe lipyakidila nokuninga omakonaakono okakalata kaye koukwashilyo, opo tu tale ngee otaka longo ngaa ile itaka longo.
Okakalata kakwao komomudo 2003 nako otaka dulu okukala ka shangwa komunhu keshe, notaka dulu okukala ka tulwa omafiku ehe li mondjila.
“Onghee nee, okudja kelelo, ohatu ti ashike ohatu ningi omakonaakono nohatu ka ya dja osho twa mona po kewiliko lokomisi yopashiwana ngee twa mane,” Osho a ti ngaho.
Rukoro eshi a popya noThe Namibian Etitatu, okwa ti Kauandenge oku na oupyakadi waye wopaumwene ndee paife ota longifa eenghono daye ongahamushangandjai wongudu opo e mu kufe mo mongudu yaavo taa ka ninga omafiyafano oupelesidente wongudu koshoongalele osho hashi hoolola pelesidente wongudu tashi ka kala ko momafiku 12 fiyo 14 aJuli.
“Oshinima osho shokutya nghi shi oshilyo shongudu inashi ningwa komunhu umwe e lili ehe fi Kauandenge, opo opo nee omaliudo aye mwene e ya mo moshinima omu,” Osho a ti ngaho.
Okwa ti oku na okukakufa ombinga momahoololo oupelesidente wongudu, kutya nee Kauandenge ile elele longudu ola hala ile inali hala.
Rukoro okwa ti ngee omakonaakono aKauandenge inaa pwa moule woivike ivali twa taalela, ota i koveta.
Okwa ti okwa ninga omafiku noilyo yongudu ndee ta mono kutya omwa pumbwa omalunduluko melelo.
“Ohatu ka ninga oshibofa sha kalela po oilyo yoNudo aishe, unene ngaa ovo tava ka ya koshoongalele. Otu na okukwashilipaleka kutya eshi inashi ningwa vali.
“Paife ongudu otai ende tai fi kashona nakashona. Ngee inatu tya ko sha koshinima shi li ngaha nomikalo diwa, ohatu i tale ashike tai fi ndee osho hasho twa hala, shaashi eli efimaneko laHosea Kutako,” Rukoro osho a ti ngaho.
Okwa li e li naumwe woshilyo shoNudo, Rirua Komeheke, oo ta ti omu na okambaina mongudu tai lalakanene okukaleka Rukoro opo a ha kufe ombinga momahoololo oupelesidente wongudu.
Komaheke okwa ti ondjokonona yaRukoro yetanga oye mu ninga opo a kale eshiivike nawa osho tashi dulu shi mu etele omawi ahapu.
“Otava kongo ondunge opo ve mu kufe mo aha ye momafiyafano oupelesidente. Ovaherero vahapu otava dulu okumulandula, shaashi eshi a ninga metanga oshe mu ninga a kale e shiivike nawa, oNudo paife oya pumbwa omunhu woukwatya wa fa waye opo ei yambule po,” Komeheke osho a ti ngaho.
‘INA TILIFWA’
Kuandenge okwa ti ina tilifwa kuRukoro ile kukeshe ngaa omunhu e li momafiyafano oupelesidente wongudu.
Okwa ti okwa kala oshilyo shoNudo eedula dihapu nova longa nanakufya Kuaima Riruako eshi kwa li e na eedula 24 eshi a ninga hamushangandjai wongudu tete momudo 2003.
“Ondi na ondjokonona iwa nongudu, ndee kapu na nande omhito imwe di tilifwe kuRukoro, omunhu opo te ya mongudu yopolotika. Kauandenge osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
