politburo yoSwapo oya hoolola Nandi-Ndaitwah oye a ninge omuhoololwa pelesidente

Onguduwiliki ya shiya ko yoSWAPO oya hala oshoongalele shongudu osho hashi hoolola pelesidente wongudu opo shi undulilwe ko2025 opo ku kelelwe omatopoko mongudu omanga ku na ashike omwedi umwe komahoololo.

Opolitiburo, oyo ya shakena luvali paife konima eshi pelesidente , Hage Geingob, a xulifa momafiku 04 Febuluali, paife oya tuma etokolo opo li ka kolekwe ile li kaanywe kongudumutima yongudu yoSwapo, oyo ya teelelika i shakene momafiku 09 Marsa.
Ongudumutima oi li we komesho kongudu oyo tai yambidida Nandi-Ndaitwah.

Ongudu tai pangele vati otai ningilwa nale omatilifo kutya otai katukilwa onghatu shi nasha neenghatu dayo doilonga dopombada.
Omupopiliko woSwapo, Hilma Nicanor, okwa koleka oshivike sha dja ko oshoongalele shopolitburo.

“Oilyo yongudu yoSwapo oya kala alushe nokuninga oyoongalele, paife ootai ningwa ya endelela medina lefyo lapelesidente wetu. Oshoongalele shEtine loshivike sha dja ko inashi hoolola nande omunhu, sho inashi ya ndja nande elombwelo opo tu popye kombinga yoinyangadalwa koilyo yoSwapo ile koikundaneki ile kovakwashiwana koonono,” Osho a ti ngaho oshivike sha dja ko.

Omutumba, oo wa talika ko kutya oo olutu la kula hali ningi omatokolo oSwapo, ou na oshinakuwanifa shokuhoolola pelesidente mu pe opo a twikile oshikako osho inashi pwa ko shapelesidente mu kulu pamhito opo ita dulu okutwikila noilonga yaye.

Oilyo imwe yomongudumutima oi na omalipulo kombinga yefimbo olo inali wana opo ku ningwe oshoongalele osho hashi hoolola pelesidente wondudu.

Ova hala natango okwoongela oshimaliwa opo ve ke shi longife meekambeina domahoololo, ponhele veshi longife po moipumbiwa yoshoongalele osho.

“Eshi to ti opu na oshoongalele, owe shi uda peni kutya otapu ka ningwa oshoongalele?” Nicanor osho a pula ngaho Etine la dja ko.
Oilyo imwe yoSwapo oya itavela kutya oshoongalele ngee osha ningwa ku na ashike omwedi umwe auke komahoololo otashi ka eta etukauko mongudu.

“Otushi shi eshi sha ningwa mepitafimbo, ashike etwalemo ola ningwa. Swapo okwa taalelela omahoololo opashiwana opo a findane nomawi mawa,” Nicanor osho a ti ngaho.

Omadilaadilo oo e li pokati koilyo imwe, oya hala ongudumutima i koleke, Nandi-Ndaitwah, ongapelesidente wongudu oo te ke i kalela po momahoololo opashiwana, nokukelela oshoongalele shiha ningwe opo kukelelwe okufifa ohoni ekotamhango loSwapo. “Pomhito opo pelesidente ita dulu okulonga oilonga yaye nandenande kutya nee etomelo ola shike, okuna okwiifanwa oshoongalele kongudumutima moule weemwedi nhatu opo kuhoololwe pelesidente mu pe, opo a twikile noshikako osho inashi pwa ko sha pelesidente mu kulu, kakele ngee omhito oyo oya holoka ku na eemwedi hamano opo ku ka ningwe oshoongalele,” Ekotamhango loSwapo osho tali ti ngaho.

ENGWANGWANO
MEKOTAMHANGO

Ovaleli vamwe voSwapo ovo va popiwa navo koThe Namibian Etine la dja ko ova ti opolitburo itai koleke pelesidente wongudu.

Omuxwaxwameki wongudu yoSwapo koKavango Uninginino, Ottilia Shiduvi okwa ti pelesidente wongudu okuna okukolekwa koshoongalele.

“Itatu likaleke kokule noshoongalele osho hashi hoolola pelesidente wongudu. Ekotamhango osho tali ti ngaho, lweekotamhango olo li li tali wilike ongudu,” Osho a ti ngaho.

Omuxwaxwameki woSwapo koshitopolwa sha//Karas, Mathew Mumbala, okwa ti oilyo yoSwapo nai efe omitwe dakula dili nhatu nongudumutima opo i hoolole ngee nakuningwe oshoongalele ile inaku ningwa. Omuxwaxwameki wokoshitopolwa shaMusati, Sacky Kayone, okwa ti ngee otaku ka ningwa oshoongalele, oshi na okutokolwa kongudumutima.

Minista mu kulu woKabinete Jerry Ekandjo omwedi wa dja ko okwa ti oshoongalele osho hashi hoolola pelesidente wongudu okwa li alushe shi na okukaningwa noshi na okuningwa.

Omudongokononi woikwapolotika, Nduba Kamwanyah, okwa ti otashi etele ongudu oupyakadi ngee oya piti omilandu dayo pomunghulo.

“Eshi inava pumbwa okuninga paife osheshi kutya inava teya ekotamhango lavo vene. Ove na okukala va takamifa,” Osho a ti ngaho.
Kamwanyah okwa ti otapa kala pe na omaupyakadi ahapu ngee oshoongalele inashi ningwa.

“Kandi shi kutya ove likolelela komhango ilipi opo va nuke po oshoongalele osho ngaashi sha yelekwa nawa kekotamhango longudu.

“Ondishi shi kutya otave lipula kutya efimbo ola ya, ashike ove na okukala ve likolelela kokatendo kawa kekotamhango,” Osho a ti ngaho.