Presidente mukulu Hifikepunye Pohamba okwa ti ina nyakulwa nande keyokomesho lokutunga oshiputudilo shoNamibia University Of Science and Technology (Nust) kEenhana olo tali ende kashona neenghono.
Oshinima eshi okwe shi popya pefimbo loshituvi shokudjala omanguwo koshiputudilo oku onghela.
“Kakwa li nda hala okuuya ko oku. Paushili, inandi hafela nande eyokomesho lokutunga oshiputudilo shEenhana. Oshiputudilo nashi pwe nale diva, shi dulife konima yefimbo. Inandi kala nale monghalo omo oshinima shonhumba shi na okutulwa moilonga inashi tulwa moilonga,” Osho a ti ngaho.
Ashike nande ongaho, Pohamba, okwa pandula Nust eshi a twala oshiputudilo koshitopolwahoololo shaashi osha eta ehongo longushu nolombilixa popepi.
“Ehongo olo vakwashiwana aveshe, kali fi ashike lounona nofamili yaPohamba. Ovanhu aveshe nava mone ehongo li fike pamwe. Kali fi ashike lovanhu vonhumba opuwo.
“Ondi li a pa handi indile omupedu minista wehongo ou e li apa opo a twale etumwalaka kepangelo li kwashilipaleke kutya ola yandja oshimaliwa kutamekwe nokumanifwe etungo loshiputudilo shaNust kEenhana,” Presidente mukulu osho a ti ngaho.
Okwa ti edu opo li li, ashike okwa tulwa ashike odalate.
“Kave na eshi va ninga po. Oto dulu ashike okuninga po sha ngee wa tula po etungo. Itatu dulu okukala tu na oshinima shi li ngaha. Eeproyeka dihapu da tulwa po komukokoli presidente Sam Nujoma okwa li da tamekwa nokwe di tula moilonga,” Pohamba osho a ti ngaho.
Omupedu minista wehongo, eduto loinima ipe, ovanyasha, omaudano, omaunghulungu nomifyuululwakalo Dino Ballotti okwa ti eemiliyona di fike lwopoN$50 oda yandjwa opo di longifwe mokutunga oiputudilo yaNust itatu, mwa kwatelwa shokEenhana.
“Oshimaliwa opo shi li nohatu lineekele okutunga oshiputudilo shomEenhana ku tameke diva,” Ballotti osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
