Oyendji taya ka futa iifendela iishona

ESHUNOPEVI moofuto dhiifendela nenge oompale dhepangelo hoka kwa li kwa tseyithwa momutengenekothaneko gwo 2009/10 olya yi miilonga Etiyali. Eyo miilonga ndika ota ku shunithwa konima sigo oku 1 lyaMaalitsa 2009.

Shika ota shi ti aaNamibia oyendji mboka haya futwa oondjambi ota ya ka futa iifendela iishona monakuyiwa, na ishewe otaya ka tegelela ya galulilwe oshimaliwa kOshikondo shOompale(Receiver of Revenue).Ndele shika ita shi ti kutya ando iimaliwa mbyoka ta yi galulilwa aafendeli unene tuu mboka haya kwata oondjambi oontshona ota ya ka mona oshindji ando, aha we omuniilonga ngoka ha futwa oshishona otaka galulilwa konyala oodola 58 komwedhi kehe.Omanga aaniilonga mboka haya kwata iimaliwa oyindji ita ya ka kala ya nyanyukwa oshoka mwene gwoompale ote ka ya pula oshindji.Okuza etiyali aaniilonga mboka haya kwatele momagala ota ya ka koleka oshikondo shoompale, sho no ta ya futu oshindji noopelesenda 37 dhaafendeli ta ya ithanwa aanene.Mboka ta ya ka mona uuwanawa owindji mehwepopeko lyo kufuta iifendela oyo mboka ye na iiyemo yi li pokati koodola 500 000 sigo 800 000 komvula.Pethimbo a li a tula omutengenekothaneko poshitaafula muMaalitsa, Ominista yEmona oya tseyithile oondondo ntano oompe dhiifendela noshowo oondondo oompe dhopevi dhiifendela, ndhoka aatseyinawa yomahupilo ya itaala otadhi ka nkondopeka aalandi opo ya ka lande nokweeta mo oodola konyala oomiliona 60 komvula momahupilo, molwaashoka yo oye na oshimaliwa oshindji okuyeleka nethimbo iifendela yawo ya li inaa yi shunithwa pevi.Pa popyo lyomutengenekothaneko Ominista oya ti oondjambi yokomumvo ndjoka yi li sigo opoodola 40 000 ita yi futu we iifendela, oku yeleka no ma 36 000 ngoka ogo ga li ondondo yokwaafuta iifendela omvula ya yi.Mboka ha ya pewa oondjambi dhi li pokati koodola 40 001 sigo 80 000 otaya futu iifendela yoopelesenda 27 adhike.Iifendela yaaniilonga mboka haya taamba iiyemo oku za poodola 80 001 sigo 200 000 ota ya gandja oompale dhoopelesenda 32 , manga mboka ye li pomuthika gwiiyemo oku za 200 001 sigo 750 000 ta ya gandja oopelesenda 34 ongo iifendela kOshikondo shIifendela.Iiyemo mbyoka yi li kombanda yoodola 750 000 ota yi ka kungunwa noopelesenda 37, kOshikondo shOompale dhoshilongo.Omithika omipe dhiifendela odha nyanyangidhwa moshifo shepangelo(Government Gazette) metiyali.Aaniilonga mboka haya mono ondjambi yoodola 36 000 mboka ya li ye na okufuta iifendela sigo oompaka ita ya ka futa we iifendela.Kakele ko ku hupitha konyala oodola 58 komwedhi, Oshikondo Shoompale nenge Iifendela oshina okugalulila aaniilonga mbaka oodola 346 molwaashoka oya futu sha pitilila oku za kuMaalitsa sigo Auguste nuumvo.Gumwe ha mono iiyemo yoodola 60 000 ota futu iifendela yoodola 5 400 nuumvo, yagwa pevi noodola 1 200 oku yeleka nomumvo gwa yi.Ta shi ti omuniilonga nguka oku na okufuta oodola 100 pevi dhiifendela oku za pehulilo lyaSeptemba nuumvo.Ye omuniilonga nguno oku na woo okugalulilwa oodola 600 molwaashoka okwa kala ta futu oshindji noodola 100 oku za muMaalitsa sigo Auguste nuumvo.Mboka haya taamba oodola 150 000 ota ya ka gandja iifendela yoodola 33 200 omvula ndji.Mbika oyi li iifendela ya shuna pevi noodola 3 450 okuyeleka naashoka omuniilonga nguka a futile momumvo 2008, sha hala okutya omugandjimpale nguka ota kala ena oodola 287,50 odhindji mondjato ye okulongitha omwedhi kehe ngashingeyi.Ye okwa tegelela woo a galulilwe konyala oodola 1 725 oku za kOshikondo shIifendela.Iifendela yoodola 151 200 ota yi kuthwa kondjambi yaangoka ha mono iiyemo yoodola 500 000 okuyeleka noodola 158 900 mbyoka omuniilonga nguka a gandjele omumvo gwa yi.Omufendeli nguno ota ka kala ena oodola 642 okulongitha mondjato omwedhi kehe ngashingeyi,na okwa tegelela Oshikondo shIifendela shi mu galulile oodola 3 852 molwaashoka okwa li ta futithwa oshindji uule woomwedhi hamano okuza muMaalitsa sigo Auguste nuumvo.Kondjambi yoodola omiliona yimwe komumvo Oshikondo shOompale otashi monoko oodola 328 700 shi li pevi noodola 5 200 oku yeleka nomumvo gwa zi ko. Shika ota shi pe aaniilonga mbaka yopondondo ndjika oshimaliwa sha hupapo shoodola 433 komwedhi kehe okulanda shoka ya hala.Noshikondo shiifendela oshi na okuya galulila oodola 2 598.Mboka ye li pondondo yi yemo oku za poodola oomiliona mbali komvula nenge oyindji yi vule mpoka oyo ye li mongundu yaa futi yiifendela aanene, mbaka oye na okugandja oopelesenda 37 kOshikondo shOompale.Oku za ngashingeyi yo ota ya ka futa oodola 698 700 ta shi ota ya ka futu oodola 14 800 komumvo oshindji nenge oodola 1 233 oshindji komwedhi okuyeleka nomvula ya zi ko.Ota ya futa woo oodola 7 398 kOshikondo shIifendela molwaashoka oya futu iifendela yi li pevi oku za muMaalitsa sigo Auguste nuumvo.Amushanga takalele Gwemona, Calle Schletwein okwa koleke kutya omithika ndhika omipe dhiifendela ota dhi longo okushuna monima sigo oMaalitsa, na ota dhi tulwa miilonga shampa ashike dha nyanyangidhwa moshifo shepangelo.Ndele omalunduluko gamwe moompango dhiifendela otaga tegelele pu etwe omalunduluko mompango ta shi pitile moshigongi shopashigwana.Ominista Yemona Saara Kuugongelwa-Amadhila okwa uvanekele kutya iifendela ya gwedhwa po ita yi ka tulwa we koondando dhomahini nosuuka. Oompango ndhika noshowo oonkwawo dhimwe ota dhi ka kundathanwa mOshigongi shOpashigwana ngele sha tameke iilonga yasho Etiyali lyoshiwike shika.