Eshi Asser Uudhila (21) kwa li a djala enguwo momudo 2022, okwa li e na eendjodi dakula donghalamwenyo.
Oku na ouhongelwe u na sha nokuungaunga noyeendifo wa dja koNamibia Universty of Science and Technology (Nust) nokwa li a nyakukilwa okukakonga oilonga neenghono. Konima yeedula mbali natango ota kendabala ashike nokumona oilonga.
“Okudja ashike efiku olo nda djala enguwo, onda kala ndi na ondjodi yokumona oilonga yange yonghalamwenyo… onda kala nokuninga omaindilo oikando ya yooloka, ashike inashi vatele sha,” Osho a ti ngaho.
Okwa ti oupyakadi wakula kombinga yoshinima eshi shokukala uhe na oilonga, okukala ito dulu okuninga eembapila doye nokuya komakonaakono oye oilonga.
Martin /Gaoseb (27) naye oku na odipoloma moikwaoungoba okudja koshiputudilo shedina Nantog Vocationala shaChina.
Okwa kala ehe na oilonga okudja ngaa momudo 2022.
“Onda kanifa omwaalu, onda kendabala okuninga omaindilo oilonga handi longifa oimaila, nomaindilo opamalungula nokuyandja eembapila dange… onda kala nokupula eemhito domalideulo ashike kakwa li nande nda pewa omhito nande efiku limwe.”
/Gaoseb okwa ti ita dulu nokulanda nande eemumbwe da keshe efiku.
“Ondi na oumbada wa keshe fiku ngee ondi na ngaa efiku ndi ka mone oilonga. Keshe fiku ohandi lipula ashike kutya ohandi hange omalalakano ange ngahelipi ngee ohandi longo nale noudjuu okumona eemhito domalideulo, omahangano kae na ehalo nepangelo mokuvatela eeindjinia odo di na ehalo neenghono.”
/Gaoseb okwa pula epangelo opo li ninge po sha komibinga yokuhe na oilonga mOnamibia.
Okwa ti oshikondo eshi oshi hadi ovanhu vehe na oilonga, ve li lwopo1 600.
“Mutu ova hafela omwaalu ou ndee vamwe fye otu li po ashike tu wanife omwaalu… mutu nandi konge oilonga mofitola shaashi osha yela kutya oshiwana eshi inashi pumbwa evatelo lange opo shi yambuke po ile nandi tambule ko ashike onghalo,” /Gaoseb osho a ti ngaho.
Valencia Roman (23), oo e na odjapo youhongelwe womakwatafano ya dja koNust odula ei, okwa ti okumona oilonga moNamibia oshi li oshinima shidjuu neenghono omunhu okwa pumbwa ku kala eshiivike opo ashike a mone oilonga.
“Moshilongo ngaashi Namibia, omo ovanhu hava longo unene noukombuda, ou ve shi otamono oilonga meendelelo.”
Oupyakadi umwe ou li kombinga yovalihongi ovo inava longwa nghee ve na okuninga omaindilo oilonga, osho a ti ngaho.
Okuninga po eembapila domaehelo oilonga oshinima sha fimana neenghono, osho a weda po ngaho.
KAPU NA OILONGA YAWANA
Omunawino moinima yapamba oilonga Herbert Jauch, okwa ti eemhito dovanhu aveshe ovo va djala omanguwo dokumona oilonga odishona neenghono.
“Ongudu yakula yavo mutu itai ka dula okumona oilonga ndee ove na okukala va handuka nai shaashi ova mana omalihongo avo ndee natango itava dulu okumona oilonga.”
Okwa ti kapu na oilonga shaashi eedjo dihapu dopaushitwe itadi longwa moshilongo.
Oshikondo shokulonga oinima natango inashi yambuka po shoo osho nee oshikondo eshi ngeno tashi dulu okuyandja oilonga ihapu kovanhu moshilongo, osho a ti ngaho.
Okwa pula epangelo opo li ninge po sha, opo la pumbwa okumona eenhele donumba ndee tali diyambula po opo eengeshefa nomayakulo a ninge ahapu.
Pelesidente wehangano ledina Namibia Chamber of Commerce and Industry Bisey /Uirab okwa kunghilila ovalihongi opo vaha kale ashike tave lihongele oinima ei tai va pefa ashike oilonga ndee opuwo, ashike nava kale tave lihongele yoo oinima ei tai va vatele okutota oilonga fiku limwe.
Natango okwa twikila nde ta ti osha pumbiwa okutala kutya oshikondo osho to lihongele ohashi yandje oilonga yoludi lilipipo.
Okwa ti vali opu na omumbwe ya kula yokuwilika ovanhu meefikola kombinga yoilonga.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
