Ovashingi voyeendifo ova indilwa vaha pitililife eefuto odo da tulwa po momafiku 18 Mei.
Eshi okwa li sha shiivifwa kuminista woilonga noyeendifo Veikko Nekundi, momukanda woikoikundaneki wa shangwa momafiku 20 Mei, ta ti eendado oda wedelwa molwondado yomahooli oyo ya ya pombada mounyuni.
Eendado odo da tulwa po, okudja moWindhoek okuya kOshakati okabesha oke na N$403, Swakopmund fiyo okoRundu oke na N$460, Swakopmund fiyo oWindhoek oke na N$230, okudja koHardap okuya kOhangwena oke na N$690.
Olweendo okudja ko Keetmanshoop okuya kOndangwa oli na N$748, omanga ovatwaalelwa okudja koRundu va yuka kOshana va teelelwa va fute N$345.
Nekundi okwa ti oministeli oya tambula ko kutya oyeendifo oyo hai tutu ovanhu oya fimana meliko laNamibia okupitila momalweendo ovanhu neyandjo lomayakulo a fimana.
“Onghee nee, oministeli oya hala okutwa ovashingi voyeendifo yokututa ovanhu omukumo va twikile nokukwashilipaleka okututa ovatwaalelwa kwaamenwa, tava wanifa po efimbo, okulifa komilandu dokuumbata ovatwaalelwa nokuyambidida eliko laNamibia,” osho a ti ngaho.
Oministeli natango otai pula oshiwana shi lopote ovashingi ovo tava futifa ovanhu oimaliwa ya pitilila peepelesenda di li 15 odo da wedwa ko.
