Minista wehongo Sanet Steenkamp okwa indila ovanyasha vaha kale noutondwe, okatongo nomatopauko, ashike nava amene ondjokonona yoshilongo shaashi ove na oshinakuwanifa shokukwatela po ombili, ouyuki noukumwe.
Eshi kwa li ta popi mefiku ledimbuluko lomadipayo a nghi na nghenda kOndangwa moshitopolwahoololo shaShana Etine, okwa ti ovanyasha nava ninge epupi li na oshinakuwanifa sha fimana shokutunga ombili yaalushe nokupotokonona eenamanana manga tava kwatele po yo ondjokonona yomadipayo a nghi na nghenda oo a ningilwa Ovaherero nOvanama pokati komudo 1904 no1908.
“Epupi leni nali kale olo hali lundululile eendjokonona di luluma moinima i na oshilonga yopashiwana,” osho a ti ngaho.
Okwa ti efiku eli lomadipayo a nghi na onghenda otali holola oiningwanima yomonakudiwa nokutambula ko oshinakuwanifa shomonakwiiwa.
Edimbuluko nali nghonopeke elitulemo mouyuki, ediminafanepo noukumwe wopashiwana.
Okwa ti omadipayo a nyanyaleka oo a ningilwa Ovaherero nOvanama ‘omahepeko’ ounhu womunhu, ta ti kakwa li ashike eponokelo loiwana ivali.
“Oululume otau twikile nomapupi nomapupi. Ashike natango, nande ongaho ovanhu vetu ova twikila nokukwatela po oukwatya wavo, omufyuululwakalo netelameno.
Ohatu twikile nokufimaneka ondjokonona yovakwamhungu ovo omalutu avo kwa li a kufwa medu eli pefimbo loilonga youkoloni,” osho a ti ngaho.
Steenkamp okwa ti efiku eli otali pula yo ounyuni u fimaneke ounhu womunhu, ta indile ovanhu va twikile nokufikama va pama mokufimane efimano lounhu, ouyuki nekelelo loinima i nyanyaleka tai ningilwa ovanhu.
“Hamunhu vali a ningilwa omahepeko a tya ngaho. Nena, eshi hatu dimbuluka oihakanwa, ohatu tyapula yoo nomhepo yaNamibia yomukumo.
“Ohatu dimbuluka oshiwana osho sha li moudjuu uhe shii okulididimikilwa ashike natango osha anya okweefa oukwatya washo, omufyuululwakalo neenghedi,” osho a ti ngaho.
Steenkamp okwa ti ondjokonona yoonakuningwa oihakanwa yomadipayo a nghi na onghenda nai twikile okuhokwifa Ovanamibia ohole, oukumwe nokweeta omalunduluko opashiwana.
Ta weda po kutya oshilongo nashi nghonopeke elitulemo lasho lopamuhanga shi tunge omudingonoko u na ouyuki, efikopamwe, efimaneko nefimaneko laaveshe, eshi tashi kondjifa okuhanga Namibia laaveshe.
