Minista womayambulepo eedoolopa noitopolwa yokomikunda James Sankwasa okwa yandja elombwelo kutya kapu na ashike okushuna ovanambelewakulunhu voitopolwahoololo moilonga ngahenya ngee eekondalaka davo dakwishi moitopolwahoololo.
Sankwasa okwa ti keshe ewiliko loshitopolwahoololo la hala okushuna moilonga omunambelewakulunhu woshitopolwahoololo nali yandje tete olopota oyo tai holola osho a pondola oule womido nhano odo a kala moilonga.
Olopota, okwa ti, nai kwatele mo ouyelele womutengenekwafano wa yandjwa kewilikongudu olo.
“Kapu na okushuna moilonga ile okuwedela okondalaka ngee kapu na eshi tashi popile oshinima eshi.
Okuwilika papuko kwomawiliko oitopolwahoololo okwa pumbwa okuungaungwa nako nelipakemo la shiya ko,” osho a ti ngaho.
Sakwasa oshinima eshi okwe shi popya oshivike sha dja ko kOtjiwarongo.
Sankwasa okwa pula omawiliko oitopolwahoololo aeshe opo a yandje omikanda doshimaliwa dao doule womido nhano mangha omafiku 15 Novemba inaa fika opo a ulike kutya oshike naana a longa.
Okwa ti oule womido dihapu, omawiliko oitopolwahoololo needoolopa “okwa kala e li mefudo mangha oshiwana tashi mono oixuna”, ndee ta pula ovanhu ava ve na oshinakuwanifa shokuyakula oshiwana va lundulule omikalo davo meendelelo.
“Omalelo oitopolwahoololo aa taa dopa okuyandja omikanda domavalulo oshimaliwa a ulike kutya oimaliwa oyo ya pewa omalelolo oitopolwahoololo oya longifwa osho i na okulonga otaa landulwa lelalela opo oinima i kale tai longifwa nawa,” osho a ti ngaho.
Okwa weda po kutya ovanailonga aveshe vepangelo nava kalele po oinima koshi yewiliko loilonga.
Sakwasa natango okwa yandja oushima kovawiliki vamwe ovo ta ti otava ningile oinima owina.
Okwa ti ohava piyaaneke oilonga shaashi kave li meengudu donhumba dopolitika.
“Opu na ovakwateli komesho voilonga vamwe have liumbata va fa ovanapolitika medina ashike lokuningila oinima owina.
Ohandi shi ningile owina shaashi kandi shi oshilyo shongudu ei. Itatu danene ongudu yopolitika, ashike oshiwana shoshilongo eshi. Ito danene ongudu yopolitika. Ito danene ewilikongudu. Ito danene minista.
Oto piyaaneke oinima yoshiwana,” osho a ti ngaho.
Okwa weda po yoo kutya oilongapondoli oyo tai hololwa komukanda womavalulo oshimaliwa otau ka ulika nghee omawiliko oitopolwahoololo taa ka dula okulonga koshi yokutwala omayakulo popepi noshiwana.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
