Ovanailonga vomomaumbo ove na oumbada wokukanifa oilonga yavo

… otava ti ewedelo leendjabi otashi dulika li ka shunife pedu eevili davo doilonga

Ovanailonga vomomaumbo ove na oumbada wokukanifa oilonga nosho yo eevili davo doilonga di tetwe eshi epangelo la hala eendjabi davo di wedelwe fiyo opoN$18 movili osho ta kutengenekwa kutya otashi ka tameka modula tai ya.

Hamushangandjai wehangano lovanailonga vomomaumbo ledina Namibian Domestic and Allied Workers Union (Ndawu), Nelly Kahua, oshivike eshi okwa lombwela oDesert Radio kutya ewedelo leendjabi otali eta oupyakadi wakula kovanailonga vomomaumbo nosho yo kehangano.

Okwa ti otashi dulika oshinima eshi shi ete omanyenyeto ahapu nomaudjuu ovanailonga.

“Otashi eta omanyenyeto ngee omafiku okulonga a tetwa aa oo naana omaupyakadi twa kala twa taalela okudja momudo 2015 nopefimbo loKolona.

“Okudja nena osho oshinima twa pumbwa okukala twa teelela notwa pumbwa okushilonga mo,” Kahua osho a ti ngaho.

Okwa ti ovanailonga vahapu vomomaumbo paife ohava futwa oshimaliwa shi fike poN$1 000 fiyo opoN$2 000 komwedi shaashi ohava longo ashike omafiku avali ile atatu.

Okuteta eevili otashi dulika kweete oiyemo i li pedu neenghono, osho a ti ngaho.

Kahua okwa ti oshinima eshi osha pumbwa okukundafanwa pokati kovanailonga, ovayandjivoilonga noministili yoilonga, omakwatafano oikwafabulika nosho yo okutota eemhito doilonga.

“Mutu otwa pumbwa eenghundafana doshipala noshipala opo tu tale kutya ohatu longo mo oupyakadi ou ngahelipi ngee ovanailonga ova kala va taalela eevili tadi tetwa,” Kahua osho a ti ngaho.

Eendjabi dipe odo da pitifwa koministili yoilonga mafiku aa, eendjabi dovanailonga vomomaumbo otadi ka kala nokuwedelwa oule weedula nhatu.

Ovanailonga vomomaumbo nava futwe oshimaliwa shi fike poN$12 movili momudo 2025, N$15 movili momudo 2026, noN$18 momudo 2027.

Paife ovanailonga vomomaumbo ohava futwa oshimaliwa shi fike poN$9,03 movili.

Ashike oshinima eshi otashi kwishi momafiku 31 Desemba neudo.

Kahua okwa ti oshinima shiwa eshi epangelo la hala okuwedela eendjabi, ashike okwa ti Namibia oku na ko shihapu natango opo a hange ondjodi yokuxwepopeka eendjabi dovanailonga.

“Okumona oshimaliwa shi fike poN$18 natango inashi yeleka ondilo yoinima mopaife, okutala onghalo omo mu na ovanailonga vomomaumbo paife,” Osho a ti ngaho.

Okwa ti ovanailonga vomomaumbo vahapu paife ohava di komalukanda navahapu otava mono oixuna okumona omalukalwa.

“Newedelo leendjabi lopaife, ovanailonga vomomaumbo itava dulu nokukalya omikuli domaumbo keembaanga, shaashi oshimaliwa shi fike poN$1 500 ile poN$2 000 oto shi longifa shike?” Kahua osho a ti ngaho.

Omunawino moinima ya pamba oilonga Herbert Jauch Etivali okwa ti oshinima eshi shokutula eendjabi pombada doshiwana otashi ka vatele okuyambula eenghalamwenyo dOvanamibia ovo ve li moilonga tai futu koxulo yeenyala.

Ashike nande ongaho, okwa hololo elimbililo ngee ovanhu otave ke liufa ngaa koshinima eshi, ta ti opa kala pu na omaupyakadi akula okuluufa kondodo yeendjabi oyo ya tulwa po, oyo ya kwatela mo oikondo ya yooloka ngaashi omatungo nounafaalama, osho yo ovanailonga vomomaumbo nosho yo ovaameni vomaliko.