Ovanailongo vaNamibia vomomaumbo nosho yo ovo ve li moshikondo shounamapya nounaimuna otava ka mona ewedelo loshimaliwa shi fike poN$3 noN$4 kodula.
Okutameka mefiku lotete laJanuali 2025, ofuto yovanailonga otai ka tulwa poshimaliwa shi fike poN$18 movili. Ashike nee, ovanailonga vomomaumbo otava ka mona oshimaliwa shi fike poN$12 keshe movili momudo 2025, osho tashi ka ninga oN$15 momudo 2026, notashi ka ya pombada fiyo opoN$18 momudo 2027.
Ovandjadjukununi vamwe ova lombwela oThe Namibian kutya eendjambi odo da shiivifwa otadi ka dopa okukandula po omikundu notadi ka ehameka ovanailongo ovo tadi lalakanene okwaamena.
Omunandjungu woikwapolitika Michael Amushelelo okwa ti shaashi ashike oshinima osha shiivifwa itashi ti osha tulwa moilonga.
“Ngaashi shito, omahangano itee ke liufa koshinima eshi. Paushili, ondi wete omakondjifafano opaveta taa di meshiivifo loshinima eshi,” Osho a ti ngaho.
Amushelelo ke wete ngee epangelo otali ka tula moilonga onotwaveta ei.
“Eshi otashi ulike sha fa okaheka molwomahoololo opo va ulike kutya ova fa ve na novanailonga,” Osho a ti ngaho.
Omuleli wehangano loNamibian Revolutionary Transport Union Petersen Kambinda okwa ti okwa pandula epangelo eshi la shiivifa oshinima eshi sheendjambi.
Okwa ti Ovanamibia vahapu ova kala tava futwa “eendjabi dovapika”.
“Otwe lineekela onghatu ya shikula ko okukundafana noikondo yonumba nomahangano. Opo keshe umwe a kale e udite aamenwa nokwa fimanekwa moNamibia, oiyemo yavo oya pumbwa lela okuyambulwa po,” Osho a ti ngaho.
Kambinda okwa ti ngee eendjabi oda kala ashike tadi yandjwa momumbwalangadjo, emanguluko lomaxupilo kali na fiku li ka hangwe.
“Okulongela kumwe oku li oupyakadi wakula moshilongo omu,” Osho a ti ngaho.
Ominista yoilonga, omakwatafano oikwafaabulika nokutota eemhito doilonga Utoni Nujoma okwa ti eendjabi edi otadi kala nokutalululwa konima yeedula mbali.
Okuvalula eendjabi edi tadi popiwa inaku kwatela mo ofuto oyo ya yandjwa ngee omunhu a longa oshilonga shonumba, omauwa omalweendo, omaumbo nosho yo omalutaima nomauwa akwao ahapu.
“Okutula eendjambi dopedu moveta, itatu amene ashike oufemba wovanailonga, ashike natango otaku wapaleke ondjila yomaxupilo e li xwepo,” Nujoma osho a ti ngaho.
Omundjadjukununi woikwapolitika Johan Coetzee okwa ti omulandu weendjambi otau ka vatela yoo opo ovanailonga vaha kale tava hepekwa.
“Eshi ohashi holoka ngee omuyandji woilonga ta yandje oilonga ishona opo aha fute oimaliwa ihapu,” Osho a ti ngaho.
Coetzee okwa ti eshi kashi na eshi tashi vatele ngee otashi longifwa ashike shaashi odula yomahoololo, ponhele yokutala kwaashi ovanhu tava dulu okuyandja. “Eendjambi daxuuninwa, odo kwa li inadi longwa mo nawa, otashi dulika di ka shonopeke onghalo yomaxupilo yopaife yovanhu ovo hava futwa oshimaliwa shi li pedu,” Osho a ti ngaho.
“Otashi dulika shi ka ete omumbwe yovanailonga ishona, ndee tashi twala pombada okuhena oilonga yovanhu ovo ve na owino ushona naavo hava futwa oshimaliwa shishona,” Osho a ti ngaho.
Omunawino woinima ya pamba oilonga Herbert Jauch okwa ti oshinima eshi shipe sheendjabi otashi ka xwepopeka eenghalamwenyo dOvanamibia vahapu ovo veli moilonga tai futu oimaliwa ishona.
“Ovanailonga vahapu Ovanamibia ohava mono oshimaliwa shi fike poN$2 000 ile nokuli shishona keshe komwedi.
Paife eshi tava futwa oN$18 , osho otashi va twala pombada va dule okumona oshimaliwa shi fike poN$3 000 komwedi,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
