Ovanailonga ve li 94 velelo loshitopolwahoololo shaKunene, mwa kwatelwa eekamusela di li nhee doshitopolwahoololo, inava mona eendjabi davo domwedi ou konima minista womayambulepo James Sankwasa ina yandja oimaliwa oyo ya yandjwa kepangelo kewilikongudu.
Omunashipundi wewilikongudu loshitopolwahoololo shaKunene Western Muharukua okwa ti ovanailonga ava va kumwa koshinima eshi inava futwa shaashi oministeli inai yandja oimaliwa okudja muMaalisa molweenamanana kombinga yeshuno moilonga lomukulunhuwiliki woshitopolwahoololo George Kamseb.
Muharukua omwedi wa dja ko okwa ti ovanailonga ova mona eendjabi davo okudja koministeli kwoovene, ashike kapu na nande ondjabi yaJuni ya yandjwa.
“Ondunge yetu okwa li okutwikila nokukundafana nombelewa yOmuprima minista nOmbelewa yaPresidente tu tale ngee otava ti ko sha koshikumungu eshi ndee tave shi potokonona pambili.
Otwa kundafana nale navo kombinga yoshikumungu eshi.
Onda popya nale naCharles Mubita, oo oye li minista mombelewa yapresidente,” osho a ti ngaho.
Okwa ti elelo loshitopolwahoololo ola tuma yo ongudu yEumbo lEpangelo i ka kundafane.
Muharukua okwa pula ovanailonga va tule mo ekangha, ta ti kutya kapu na etomone va kale inava futwa.
“Sankwansa okwa kala taa nyene oimaliwa yetu, oyo ya yandjwa kopaliamente, kashi shii kuye, okudja muMaalisa neudo,” osho a ti ngaho.
She likolelela kuMuharukua, elelo loshitopolwa ohali longifa oshimaliwa shi fike lwopeemiliona N$2 meendjabi keshe omwedi.
Oshinima eshi sheendjabi itadi futwa osha etwa keenamanana di na sha nokushuna omunambelewa akula woshitopolwahoololo.
Momukanda wa pitifwa kehangano ledina Public Service Union of Namibia (PSUN) owa ti itatu popile ovanailonga va kale inava futwa medina leenamanana doministeli newilikongudu.
“Eyandja leendjabi kali na sha nomatokolo opapolitika ile oilonga inai wapala yewilikongudu loshitopolwa shaKunene nOministeli yOmayambulepo Eedoolopa nOitopolwa yOkomikunda okupotokonona euliko lomunambelewa akula woshitopolwahoololo,” ehangano tali ti.
Oministeli oya popya kutya eendjabi otadi dulu okufutwa, kutya nee opu na eenamanana kombinga yomunambelewa akula woshitopolwahoololo.
“Itashi udika ko kutya ovanhu otava nyengwa okupotokonona oshikumungu eshi,” ehangano tali ti.
Ola yandja yo vali oushima kovakufimbinga aveshe, tali ti omaliumbato a tya ngaha ee na oilanduli ya mana mo kovanailonga.
Ehangano otali indile ovakufimbinga aveshe va potokonone oshikumungu eshi meendelelo ndee tava kwashilipaleke kutya ovanailonga ovafutwa.
EKANGHA
Momukanda wa shainwa kovanailonga ve li o-30, ovanailonga otava ningi omatilifo okuya mekangha ngee eendjabi davo inadi futwa.
Ova ti kutya itava dulu okumona oixuna medina leenamanana domauliko onguduwiliki nomatokolo oministeli okukala ya kukutila oimaliwa oyo ya dja kepangelo.
“Katu na ondjo ohatu longo oilonga yetu nawa ngaashi epangelo novanhu moKunene ve lineekela,” omukanda tau ti.
Ovanailonga otava ti kutya ekaleko leendjabi otali kala noilanduli ya nyika oshiponga, mwa kwatelwa omikundu dokulanda oikulya, okufa eehiila, omayakulo opaunamiti nokufuta eengunga nomakwashilipaleko.
