Ovanailonga vamuni koMariental Etine ova yandja omukanda komulunhuwiliki wamuni, Paul Nghiwilepo, tau pula ewedelo leendjabi neepelenda di li nhatu domudo woshimaliwa 2025/26.
Omukanda okwa li wa tambulwa ko kuNghiwilepo ponhele yamayola waMariental Esthel Isaaks.
Ovanailonga ova kalelwa po kehangano ledina Namibia Local Authority Workers Union (NALAWU).
She likolelela komukanda, NALAWU namuni waMariental okwa li nale va kundafana kombinga yewedelo leendjabi domudo woshimaliwa 2025/2026, opo kwa li aveshe va itavela ewedelo leepelesenda di nhatu nokuxulifa po okulonga keekondalaka.
Eudafano okwa li la teelela okudiminwa kuminista.
Ashike nee, ehangano otali ti eudafano kakwa li la diminwa kuminista, osho sha fininika ovanailonga va holole omalimbililo avo pamukanda.
Ovanailonga ova ti eindilo lewedelo leendjabi ole ya mokati konghalo yomaxupilo ya ninga ondilo, eendado tadi i pombada neemumbwe domomaumbo tadi ningi dihapu, odo tava ti otadi twikile okutwika ovanailonga neefamili omikundu dopashimaliwa.
“Ewedelo leendjabi neepelesenda nhatu oli li xwepo notali dulu okuxwepopeka onghalo yomaxupilo oyo ya ninga ondilo neenghono, okuyambidida onghalonawa yovailonga nonghalo yoshimaliwa, nosho yo okukwatela po omukumo wovanailonga noilonga iwa,” omukanda osho wa ti ngaho.
Ovanailonga natango ova holola elimbililo kutya nande epangelo ola shiivifa kutya ovanailonga valo otava ka wedelwa diva, ovanailonga vomalelo eedoolopa kakwa li va kwatelwa mo.
Pakuweda kewedelo leendjabi, ovanailonga ova indila kutya omukulunhuwiliki na longekide oshoongalele pokati keekamusela dipe damuni novanailonga opo va kundafana oikumungu ya kuma ovanailonga.
Omukanda owa popya kutya ovanailonga ova teelela enyamukulo moule womafiku aheyali oilonga, ngee hasho otava tumu oshikumungu eshi kombelewa yomunambelewa akula woipambele yoilonga ndee tava ningi ehololomadilaadilo lopambili.
Omunashipundi wokomitiye yewiliko yaNALAWU moshitai shomoMariental Linus Sinvula okwa shaina omukanda ou ponhele yovanailonga.
Nghiwilepo okwa kwashilipaleke ovanailonga kutya oshikumungu eshi otashi ka kundafanwa newiliko lamuni.
–NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
