Omukuluhuwiliki mu kulu woilonga noyeendifo, Peter Mwatile, okwa kunghilila opo ku ha longifwe nai edina lomukokoli pelesidente Sam Nujoma shi na sha naao ta ningi pelesidente mupe wongudu yoSwapo.
Nujoma ita dulu okukoleka omatokolo e li ominge nekotamhango longudu, osho a ti ngaho.
Etumwalaka olo la leshwa komuprima minista, Saara Kuugongwelwa-Amadhila, ponhele yaNujoma koshoongalele shongudumutima yoSwapo mOlomakaya ola koleka omupedu pelesidente Netumbo Nandi-Ndaitwah ongaomuhoololwa pelesidente wongudu tai pangele ta ka kalela po omahoololo neudo.
Eedula twa dja opa kala pu na omalipulo kutya ovanhu ovo ve li popepi napelesidente otava longifa edina laNujoma shi na sha nopolotika. Mwatile, oo kwa li ha longo ongahamushanga ta kalelele mombelewa yomupelesidente mu kulu Hifikepunye Pohamba, Omaandaxa okwa ti etumwalaka olo tali koleke Nandi-Ndaitwah a ninge pelesidente wongudu kakwa li la longekindwa kuNujoma.
Okwa ti Kuugongelwa-Amadhila okwa li e na okupula Nujoma ngee oye ngaa a longekinda oshipopiwa shili omanga inashi leshwa. Mwatile okwa ti omanga omuprima minista ina tameka okulesha oshipopiwa, oilyo imwe yongudumutima oya tameka okuhakela omake nokunhuka pombada.
“Osha fa ngeno veshi shi nale eshi shi li moshipopiwa. Ongudumutima yoludi lilipipo ei? Ohandi feekele kutya eshi kakwa li oshipopiwa shaNujoma. Okwa li shainwa kuye. Ashike okwa li sha kufwa momikala,” Osho a ti ngaho.
Omaandaxa eshi kwa li Kugongelwa-Amadhila a tuminwa outumwalaka vaxupi ina nyamukula. Ashike nee, omuvateli wopaumwene waNujoma, Paulus Shipale, Omaandaxa okwa ti Nujoma oye a longekida oshipopiwa. “Paushili, onda shinga nanda ya koHenties Bay Etitatu ndee handi aluka Etitano nombapila oyo, oyo kwa li a hala okukayandja yeemwene kongudumutima, ngaashi naana kwa li a shivwa ongaoshilyo tashi kalelele shopolitburo nongudumutima yoSwapo,” Osho a ti ngaho. Shipale okwa ti molwoinima imwe ya fimana naikwao oyo inai teelelwa, Nujoma ina dula vali okuholoka koshoongalele ndee ta pakwile Kuugongelwa-Amadhila oshinakuwanifa opo a yandje oshipopiwa shaye.
“Osha nyika oshiponga okukala wuudite kutya omunhu ota dulu okuyandja nokupopya oshipopiwa ponhele yomukokoli pelesidente omanga ina pewa epitikilo,” Shipale osho a ti ngaho.
Okwa ti: “Omukokoli pelesidente okwa yandja omaliudo aye mwene shaashi oku li oshilyo shongudu sha fimana.”
Mwatile okwa ti nande ovaleli wongudu yoSwapo otava ti oinima aishe oya enda nawa koshoongalele shongudumutima, eshi hasho shi li ngaho.
Ovanhu vamwe ovo va li koshoongalele ova pula opo elandulafano loikundafanwa yoshoongalele li lundululwe, ashike otwa kelelwa kokangudu oko taka popile Nandi-Ndaitwah opo a ye moupelesidente woSwapo oye auke.
Mwatile natango okwa lundila Nandi-Ndaitwah kutya ina kwatela oshoongalele komesho nawa.
“Omunashipundi ina ulika ouleli, oshoongalele okwa li tashi wilikwa kwaavo kwa li va holoka. Kapa li nande ouyuki. Oshoongalele inashi enda nande nawa. Okwa li pu na okuhaudafana nokuteya eemhango dongudu,” Osho a ti ngaho.
Pefimbo loshoongalele, nakulwa mu kulu wongudu Ben Amathila okwa li a pula opo oshipopiwa shi yandjwe kukeshe oshilyo shongudumutima opo shi konaakonununwe, ashike inashi ningwa.
Amathila Omandaaxa okwa koleka kutya oshipopiwa kakwa li sha yandjwa.
“Ondi wete kutya kakwa li pu na oikwafifo yokushininga shihapu,” Osho a ti ngaho. Oilyo imwe yongudumutima oya tameka okupula oukwashili woshipopiwa shaNujoma. Umwe womoilyo ei oMartha Namundjebo-Tilahun, oo a pula oumbangi woshipopiwa osho. Namundjebo-Tilahun Omaandaxa eshi kwa li taku kendabalwa opo a monike yee a tye ko sha ina monika.
Ndandi-Ndaitwah eshi kwa li a dengelwa koThe Namibian opo a tye ko sha okwa tuma okatumwalaka, taka ti “Ombili, itandi dulu okupopya paife.”
Ina nyamukula vali omatumwalaka oo a tuminwa. Omundjadjukununi woikwapolotika, Ndumba Kakwanyah, okwa ti ngee omapopyo oo taa ti Nujoma haye a longekida oshipopiwa ee li mondjila, edina laye okwa li la longifwa shi na sha noidjemo yoshoongalele shongudumutima.
“Efeni omunhu a tyapula onghalamwenyo yaye ndee ta tyapula ovatekulu waye. Okwa longa shihapu. Kashi shi shiwa okulongifa edina laye,” Osho a ti ngaho.
INANDI HALA OKUNINGILWA SHA
The Namibian oya lombwelwa kutya hamushanga mu kulu woSwapo Pendukeni Iivula-Iithana okwa koleka Nandi-Ndaitwah a ninge omupelesidente wongudu konima eshi oshipopiwa shaNujoma sha leshwa. Iivula-Ithana okwa ti yee ina hala nande okuningilwa sha shi na sha nomahoololo oo taa ka ningwa momafiku 27 Novemba.
Ina popya ngee ota ka kambainina Nandi-Ndaitwah, ashike okwa ti otai ashike netokolo olo tali ka ningwa kuvahapu.
Iivula-Ithana okwa li e na ekwatafano li lula nanakufya pelesidente Hage Geingob, osho she mu taataifa mEpangelo.
“Alushe ame opo nda kala okwa li ashike nda tewaatewa mo melelo. Inandi xulifa po nande oilonga, nghi na fiku nda kambainine ndi li ominge nongudu. Onda ya ashike keumbo ndee handi fuda po.” Iivula-Ithana osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
