… Ovalandi ove udite “va kengelelwa”
Omunangeshefa oo a ninga omunandjungu moinima ya pamba ovanyasha Michael Amushelelo okwa koleka kutya ovalandi vaye vamwe moproyeka yomaumbo oo e na ombilixa otava pula opo va pewe oimaliwa yavo oyo kwa li va futa shaashi oproyeka oya kala tai shuna monima oule weedula nhee paife.
Amushelelo okwa li a shiivifa oproyeka yomaumbo koBrankwater okudja momudo 2021 oyo tai tungu omaumbo ovanhu ovo ve na oiyemo yopokati, ovo shi li shidjuu kuvo okumona omikuli keembanga.
Ashike otashi monika sha fa shidjuu komulumenhu oo e na oibofa inai pwa natango i li momhangu, omo mwa kwatelwa oibofa i li 365 yekengelelo.
Momukalo wokukengelela omu omwa kwatelwa okukufa oimaliwa kovanhu ovo kwa li a lombwela kutya otava ka mona oshimaliwa shihapu konima yefimbo.
Paife Amushelelo okwa taalela vali omanyenyeto okudja kovakwashiwana ovo kwa li ve mu pa oimaliwa shi na sha noproyeka yomaumbo, yedina Group Save Namibia.
Ehangano lokwaandjakaneka omawi momhepo laNamibia oshivike sha dja ko okwa li la uda kutya umwe oo a yandja oimaliwa yaye shi na sha noproyeka ei, Rakkel Amunwe, oo a ti okwa kala ha futu oshimaliwa shonhele keshe kodula.
Fiyo opapa kapu na nande osho sha ningwa po kombinga yomaumbo.
“Ondi wete lela nda kengelelwa,” Osho a t ngaho.
“Eedula otadi a doo tadi i ashieohandi futu ashike oimaliwa yange, ashike kandi wete nee pu na osho tashi ningwa. Okudja ashike momudo 2022 otwa kala hatu udanekelwa kutya ohatu i momaumbo omu ile keshe konima yeemwedi nhano ohatu udanekelwa kutya omaumbo otaa tamekwa okutungwa, ashike otwa tameka okukala tu na omalipulo, shaashi oilonga ei itai tameke diva,” Amunwe osho a ti ngaho.
Oproyeka yAmushelelo otai pula ovaningi veehelo opo va fute ko oshimaliwa shi fike poN$60 000, osho hashi futwa taku yandjwa keshe komwedi, ashike eedula nhee koinima oshinima eshi sha totwa, kapu na eumbo la tungwa.
Amunwe okwa ti osha kala she mu djuupalela opo a mone Amushelelo va ninge oshoongalele.
Amushelelo Omaandaxa okwa lombwela oThe Namibian kutya oshinima eshi tashi kateke oproyeka i ye komesho elelo lodoolopa yaVenduka shaashi inai yandja epitikilo. Oshinima shimwe elelo lodoolopa yaVenduka ola hala moproyeka mwa kwatelwa eepate, osho a ti ngaho.
“Ova ti eepate odi na okukala da kula, ndee eshi osha hala kutya otu na okuninga eenhele detu di shona ashike osho otwe shi ninga. Oshitivali, okwa li pu na oshinima oshomalambo onyata, ashike elelo lodoolopa inali uya mo moshinima eshi,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
