Ovakwativeeshi aveshe nava shune moilonga – Venaani

Omuleleli wongudu yoPopular Democratic Movement, McHenry Venaani, okwa ifana ovakwativeshi aveshe ovo vehe na oilonga naavo va kala ashike tava longo ongovavateli opo va shune kefuta.

Venaani eshi okwe shi popya pefimbo kwa li ta popi novakwati veshi ve li 1 300 kOmbaye Omaandaxa.

Okwa li a ka talela po ehangano ledina Namibia Ports Authority (Namport) novakulunhuwiliki valo.

“Ehangano eli okwa li la pewa oshinakuwanifa kepangelo opo li yandje eemhito doilonga neendjabi delixwa po kovakwativeeshi ovo vehe na oilonga,” Venaani osho a ti ngaho. “Ngeenge u li mefuta ongomukwatiweeshi neevili doye, olutaima naikwao ihapu, oto dulu okudja mo noN$18000 fiyo N$25000, oshe likolela kutya owa longa oilonga i fike peni.

“Paife, omahangano aa ee mu tuma komaumbo, ove mu mweneka voo tave mu pe N$4000. Ngee mwa hala okupopya kombinga yasho, otave mu lombwele kutya inamu shi ninga, ashike oiyemo ei hava mono mefuta otai indjipalekwa lutatu,” Osho a ti ngaho.

Venaani okwa ti omahangano okukwata eeshi otaa dulu okufuta ovanailonga eendjabi diwa nande osheshi kwa li hava kala moilonga efimbo alishe ashike natango otaa ningi ashike oshimaliwa shiwa.

“Okudja komukwatiweeshi wa yuka komunailonga wa keshe shimwe, ndee oto pewa N$4000, omanga tava ningi oshimaliwa shihapu. Osho oshi na okuxula. Ondi na etumwala la yela kutya ovakwativeeshi aveshe nava shune moilonga nande nee epangelo ola hala ile inali hala,” Venaani osho a ti ngaho. Venaani okwa twikila ndee ta ti ngee ehangano lokukwata eeshi kali na eembautu da wana dokukwata eeshi, inali pewa oufemba li kwate eeshi.

“Katu na ko nasha ashike ngee owa mono oufemba wokuya mefuta u ka kwate eeshi, ino fiya nande omunhu umwe meumbo. Hamunhu a longo e li meumbo ongomunailonga wa keshe shimwe, ovanhu ashike efele ve li mefuta. Oiyemo nai tukulwe,” Osho a ti ngaho. “Ngee opolohalama yepangelo yokuyandja oilonga oye lipaka mo, okwa li ya pumbwa okwaamena ovanailonga,” Osho a ti ngaho. Petameko lomwedi ou mopaliamente, Venaani okwa li a pula minista weeshi noinima yomefuta, Derek Klazen, ngee okushi ngaa oupyakadi oo wa etwa kopolohalama yokuyandja oilonga yepangelo. Okwa pula natango minista opo a yandje ouyelele u na sha nokuyandj oilonga kovakwativeeshi koshikondo sheeshi dohaika.

KOMBINGA YOPOLOHALAMA

Minista weeshi noinima yomefuta nominista yoilonga mo2020 okwa li va eta po omukalo wokuyandja oilonga kovakwativeeshi nokuvafuta oshimaliwa she lixwa po.

Eudafano pokati keeministili edi mbali okwa li la ningwa muApilili odula yadja ko, neudafano tali ti ofabulika yoshi yohaika oya itavela okuyandja oilonga kovakwativeeshi ve li 681.