Ovakwashiwana va hala okuuda ngee Mbumba omupelesidente ta vatele

… Mbumba ita vatele, omupelesidente
ashike ngaashi vakwao

KONIMA eshi Nangolo Mbumba, a ninga omupelesidente waNamibia momafiku eshi a li 04 Febuluali, ovakwashiwana ova kala nokupula ngee omupelesidente wopokafimbo ile omupelesidente omutine waNamibia.

Mbumba okwa ya ponhele yaGeingob oo a fya mu04 Febuluali.

Oshikumhungu eshi osha kala nokudana onghandangala komapandja okomalungula, kutya Mbumba omutine okwaanena oshipundi shoupelesidente opo a ninge omupelesidente ta vatele ile okwa ninga ashike omupelesidente filufilu.

Namibia okwe lihanga moudjuu ou konima yeedula omulongo eshi kwa li ekotamhango la shendjwa opo kukongwe onhele yomupedu pelesidente.
Omushiiviveta Kadhila Amoomo, okwa ti eeveta edi da pumbiwa moshinima shi li ngaha otadi hangika moutendo 28, 29, 30, 31, 32 no34 vekotamhango laNamibia.

Okwa ti yee okuwete kutya Mbumba okwa li aanifwa opo a ninge omupelesidente omutine waNamibia.
“Omadilaadilo ovanhu vamwe oo taa ti oku li ashike omupelesidente ta vatele ndele keshi omupelesidente woshili itaa popilwa kokatendo 30, oko taka popi kombinga yeano olo kwa li la ningwa mu04 Febuluali. Natango itashi popilwa kokatendo 29 kumwe nokatendo 34,” Amoomo osho a ti ngaho.

Amoomo okwa ninga eyelakanifo naasho sha ningilwe moSouth Africa nomoZambia shaashi oilongo oyo ivali oya pita moshikumhungu sha faafana naashi tu na nena moNamibia.

Mo2008, South Africa okwa li e na omhito youpelesidente ya yuuluka eshi pelesidente Thambo Mbeki, a fiya po oilonga ndee Kgalema Motlanthe, ta ningi omupesidente wopokafimbo waSouth Africa fiyo omahoololo a shikula ko mo2009.

Motlanthe natango okwa talwa ko ashike onga omupelesidente omutitatu waSouth Africa nande kwa li ashike ta mane ko oshikakofimbo sha Mbeki.

“Eyelakanifo olo otali tu lombwele kutya pelesidente ta vatele ota dulu okukala omupesidente woshili. Oshitya ‘ta vatele’ osho sha longifwa mekotamhango kashi shi oshityalonga ndele oshityadina. Eshi otashi kala ashike sha yela ngee owa yelakanifa ekotamhango laSouth Africa naZambia olo la tambula ko omupelesidente ta vatele. Onghee nee, pexulilo, pelesidente Mbumba, omupelesidente omutine waNamibia,” Amoomo osho a ti ngaho.

Omushiiviveta Berhard Tjatjara, okwa ti oshili ei kutya Mbumba okwaana oshi na okupangela, kutya nee ovanhu ove na omalipulo a hapu kombinga yekotamhango eli la pitika oshinima shi li ngaha.

“Eyooloko ola pumbwa okuningwa kutya onaini omupedu pelesidente e na okuninga omupelesidente ta vatele nonaini e na okukala omupelsidente. Ngee taku tiwa pelesidente mu kulu otaku popiwa ou a li ko omanga inaku ya pelesidente ou a hoololwa, ashike ngee otaku ti wa okwa ya ko ponhele yapelesidente mu ku ngaho oye a landula pelesidente mu kulu, omo omupedu pelesidente ha i ponhele yapelesidente ashike ita vatele nee, nande nee ina hoololwa kovanhu ponhele okwa ya po shi li paveta ngaashi ekotamhango tali ti,” Tjatjara osho a ti ngaho.

Omushiiviveta Mbanga Siyomunji, okwa ti Mbumba omupelesidente ndee keshi omupelesidente ta vatele shaashi okwa li aanifwa onga pelesidente yee oye ondjai yetandanga leameno moshilongo.

“Okatendo 29 otaka popi kombinga yoshikako inashi pwa ko, osho pamhito ei shihe fike podula, opo ku ningwe omahoololo, kookatendo 34 otaka popi kombinga yomunhu wotete oo e na okutwikila oshikako osho sha fiwa inashi pwa komupesidente mu kulu, ou e li pombada omupedu pelesidente, oo paife aanifwa onga pelesidente Mbumba, a pewa eenghono adishe doupelesidente,” Siyomunji osho a ti ngaho.
Oo a li nale kamusela koshikandjohoololo shaWalvis Bay, Knowledge Iipinge, naye okwa waimina eemhata.

Okwa ti okatendo 30 okapopya ashike kombinga yomuhoololwa-pelesidente a ninga eano ndele inaka popya nande osha kombinga yomupelesidente ta vatele ile wopokafimbo.

“Osho sha hala okutya ngeenge okwa tulwa kumwe okatendo 30, 28, 2(C) no34, Mbumba okwa mona eenghono ngaashi ashike ovapelesidente vakwao ovo va hoololwa nokwa ninga omupelesidente omutine ,” Osho a ti ngaho.

Omudongokononi woikwapolotika Stephanus Pombili, okwa twikila nokufatulula kutya okatendo 28 (2C) otaka pumbiwa ashike ngee omhito yoilonga oyo ye ya omanga ku na odula imwe opo ku ka ningwe omahoololo oupelesidente.

Paife shaashi ka ku na omahoololo moule womafiku 90 ngaashi tashi popiwa mokatendo 28, pomhito napa ye omunhu ngaashi tashi popiwa mokatendo 34.

“Eshi osha hala kutya Mbumba ita vatele shaashi kapu na omahoololo taa ka ningwa moule womafiku 90 opo ku ka hoololwe pelesidente. Ponhele yaasho, ota tameke ashike oilonga onga pelesidente,” Osho a ti ngaho. Omupopiliko wongudu yo-United Democratic Front (UDF) Mabasen //Narib okwa ti, etomelo olo kutya Mbumba ota lele fiyo 21 March 2025, kashi li vali koshi yodula, onghee okwa li kwa pumbwa okuningwa omahoolo muule womafiku 90 ngaashi ekotamhango tali ti.

“UDF oya hala okushiiva omukalo oo wa longifwa opo ku monike kutya oshikako osho inashi pwa ko shapelesidente okwa li shi li koshi yodula imwe.

Ekotamhango ola popya kombinga yoshikako ashike inali popya nande kombinga yefiku lomahoololo oupelesidente,” Osho a ti ngaho.

Okwa pula vali kutya omolwashike Mbumba a yelwa opo a ninge pelesidente, omanga ekotamhango tali ti oku na okukala omupelesidente ta vatele. “Okatendo 34 oke na okukala ka yela nawa kombinga yomulanduliko, ndee ngaashi sha teelelwa okatendo oka yandja ouyelele kombinga yelandulafano peenghatu kutya olye a wana okuyandeka omhito yombelwa yapelesidente.

Ashike nee eshi inashi landulwa osheshi kutya, omunhu oo e na okuya pomhito opo na talwe ko onga ta vatele pefimbo olo kwa li li na okulelwa kupelesidente mu kulu,” //Narib osho a ti ngaho.