Ovakongo ovo tava ka umba ovanambelewa veameno ovo va tulwa mEtosha National Park otava ka dipawa.
Ekunghililo eli ola dja kukomufala wopolifi koshitopolwahoololo shaShikoto Theopolina Kalompo-Nashikaku pefimbo loshoongalele nangoloneya waShana Elia Irimari kOshakati Etitatu.
Oshoongalele okwa li sha tala kokulwifa oimbuluma yoinamwenyo yomoixwa mEtosha nopomudingonoko walo.
Kalompo-Nashikaku okwa ti ngee ovakongi va mono ovanambelewa tava ende monhele omo, efimbo limwe ohave va umbu.
Eshi otashi lyatele pedu eenghono dovanambelewa veameno, osho a ti ngaho.
Ovanambelewa veameno ovo vatulwa monhele yoshilongo ei oilyo yetanga lovakwaita laNamibia, yopolifi yaNamibia nosho yo vokoshikondo shokwaamena oinamwenyo yomoixwa shoministili yomidingonoko, omakuti nomatalelepo.
Aveshe kumwe ove shiivike nawa kutya ongudu oyo i li ominge nomaukongo ehe li paveta.
“Ohatu ka vatela ovanhu ava va shune komushiti wavo. Eemwenyo detu odi li moshiponga. Ito dulu okuumba ovanhu ovo va deulilwa okuumba,” Osho a ti ngaho.
Kalompo-Nashikaku okwa ti omaukongo ehe li paveta okwa yuka pombada keshe efimbo monhele omo.
Okwa ti vali, eemanda di li 30 okwa li da dipawa okudja muJanuali fiyo omuJuni, novanhu ve li 42 okwa li va mangwa po mekwatafano nomaukongo aa ehe li paveta.
Komufala okwa ti kamu na nande omunhu umwe womongudu yokwaamena oinamwenyo mwaavo va mangwa po.
Ashike ne, okwa itavela kutya oilyo yongudu ei yokwaamena oinamwenyo oya kala nokumangwa po nale shi na sha nokukufa ombinga momaukongo aa ehe li paveta omanga kwa li ina hoololwa ongokomufala wopolifi koshitopolwahoololo oko.
Kalompo-Nashikaku okwa ti ovanambelewa ovo va tulwa mEtosha ohava ningilwa omakonakono e lipaka mo.
Okwa ti omaluvinga eemanda e li 60 okwa li a monika.
“Ashike natango otu na omwaalu wa pumbwa okukolekwa.”
Kalompo-Nashikaku okwa ti omidimba di li 30 deemanda da dipawa shihe li paveta okwa li da monika.
Komufala okwa ti ovanhu vamwe ovo va mangwa po omwa kwatelwa ovanhu ovo va idilila ovakongi vehe li paveta, ovanhu ovo hava eta ovakongi ava ngee tave ya okudipaya oinamwenyo, ovo hava futu opo ovanhu va ka dipaye oinamwenyo naavo hava yandje oikulya kovanhu ovo.
Okwa ti kutya oukongo uhe li paveta oshimbuluma sha longekidwa.
Kalombo-Nashikaku okwa li a hoololwa a ninge komufala wEtosha National Park muMarsa oule woshikako sheemwedi hamano.
Okwa ti oiningwanima ihapu tai piyaaneke oya ningwa moshitopolwahoololo shaShana.
Ovakongo ohava ka hondama mOndangwa, Ongwediva nOshakati ngee va dja kEtosha, osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
