Ovakalimo vomolukanda ledina Empelheim Extension 5 moMariental Etivali ova shangela muni omukanda, tava pula va pewe olusheno nomayakulo okuwilika oimbodi a nuka po molukanda.
Omukanda, wa yandjwa komuleli wolukanda, Kristophina Hoitembo kumayola wodoolopa, Ethel Isaacks, owa ti kutya omumbwe yolushelo oi li omukundu unene tau hepeke eenghalamwenyo dovakalimo.
She likolelela komukanda, omumbwe yolusheno oya fininika ovakalimo ve likolelele moulehite, oufiya vomahooli nokutema noikuni, osho she va tula moupyakadi womindilo nomaudu aeshe haa di momwifi.
Ovakalimo natango ova popya kutya omalukanda kae na omalamba, osho tashi tula eameno moshiponga nokutota eenghalo odo tadi dulu okuxwaxwameka oimbuluma nokutula ovakainhu, ounona novakwashiwana vakwao moshiponga.
Omukanda natango owa popya kutya omumbwe yolusheno otai i ehongo moshipala noinyangadalwa yopaliko, shaashi ovanafikola itava dulu okulesha nawa konguloshi, omanga eengeshefa dishona ngaashi oufitola vopomaumbo neeshalona itadi dulu okulonga nawa.
Ovakalimo otava pula va pewe oukefa vomalusheno, omandoloma okutula oimbodi nomayakulo akeshe efiku okwoongela oimbodi.
Eshi a tambula ko omukanda ponhele yaIsaacks, omukulunhuwiliki wodoolopa yaMariental Paul Nghiwilepo okwa ti opwa fa pu na eudeko la puka kombinga yomafaneko amuni okuyandja omayakulo koExtension 5.
Nghiwilepo okwa ti oimaliwa yepangelo oyo ya pewa muni otai lalakanene okuyandja omayakulo momalukanda aeshe, mwa kwatelwa koExtension 5.
“Kandi shii kutya ouyelele owa dja peni kutya oExtension 5 itai mono omayakulo.
Oimaliwa oyo twa mona oyokuyandja omeva, oundjuwo, eepate nolusheno kovakalimo aveshe momalukanda aeshe,” osho a ti ngaho.
–NAMPA
