Ovakalimo vomoGroot Aub Extension 2 ova indila elelo laVenduka li kaleke omulandu walo wokuyandja oufemba wokuhiila edu fiyo kwa ningwa eenghundafana domondjila.
Ovakalimo vamwe ova ti kave na oshimaliwa osho tashi pulwa kelelo.
Omanyenyeto aa okwa li a yandjwa pefimbo loshoongalele sha ningilwa pokapale ketanga lokeemhadi kaGroot Aub Olomakaya, oko ovanambelewa vElelo lOshilando va yandja ouyelele kombinga yokushaina omaudafanotwokumwe e na sha noufemba wokuhiila edu.
Omunandjungu woshiwana Cecil Titus okwa indila muni a kaleke oshinima eshi fiyo kwa ningwa eenghundafana domoule.
“Itatu anye eyambukepo, ashike otwa hala la ningwa pamukalo u li melandulafano,” Titus ta ti.
Okwa ti ovakalimo otava yambidida eenghendabala dokuyandja oumwene wedu ashike itava popile osho tava ti omulandu tave ufininikilwa puhe na eenghundafana domondjila.
Titus okwa ti omikanda odo da yandjwa koshiwana otadi ti eehecta ashike di li lwopo65 da kwatelwa mo, omanga oGroot Aub i na eehecta di li lwopo8 000.
Okwa indila yo elelo li tambule ko eindilo okudja kelelo lopamufyuululwakalo leeBaster li undulile komesho oshinima eshi fiyo kwa ningwa eenghundafana dimwe.
“Otwa hala okukufa osho hatu dulu okufuta. Inamu tu fininikila oinima,” osho a ti ngaho.
Titus okwa ti ovakalimo vahapu ihava longo nove na oumbada wokuninga omatokolo opashimaliwa itava ka dula oku a wanifa po.
Okwa ti omulandu tau kelele okuyandja omadu wa tulwa po konima yomido o20 owa fiya ovanyasha vahapu vehe na omadu, omanga okulikufila omadu kwa twikile omido adishe odo.
“Ngee itamu kundafana nawa nashe, oshoongalele eshi kashi na eshi tashi eta po,”osho a ti ngaho.
Elias Nekondjo, omukalimo womoGroot Aub oule womido nhano, okwa ti elelo loshilando nali fimaneke okuyandja omayakulo a fimana manga inali fininika ovakalimo va shaine omaudafanotwokumwe ohiila.
“Otwa kala tuhe na omeva oule womido,” osho a ti ngaho.
Nekondjo okwa ti omaumbo ahapu otaa twikile nokumona omayakulo a nghundipala nande ova kala nokuninga omaindilo kumuni oikando ya yooloka.
“Ovanhu ova kumwa kutya otava ka futa ngahelipi omadu ngee natango ihava mono omayakulo a wana.
Paife ngaha omeva oupyakadi wetu wa kula,” osho a ti ngaho.
Omukulunhuwiliki welelodoolopa laVenduka Moses Matyayi Olomakaya okwa ti muni okwa eta po oshinima eshi shohiila yedu ongomulandu wopakafimbo shaashi oshipofa osho shi li komhangu osha kateka omashangifo omikanda detu.
Okwa ti eenhele odo da metwa nale di tungwe omaumbo itadi dulu okushangifwa di mone omikanda fiyo oshipofa sha manifwa.
“Otwa hala ngeno tu teelele fiyo oshipofa shomhangu sha manifwa, ashike ovanhu natango inava filwa oshisho,” Matyayi ta ti.
Okwa ti elelo ola mona kutya oshi li xwepo okuyandja omadu pamukalo wohiila koshiwana ponhele yokuteelela omhangu i manife oshipofa.
“Omulandu otau lalakanene eudafanotwokumwe lohiila opo u dule okutya edu eli olange fiyo la ya kedina loye pambelewa,” osho a ti ngaho.
Matyayi okwa ti omaudafano ohiila itaa pitike ovakalimo va landife po omadu avo ashike otaa lalakanene okuvaleka eenhele fiyo da pewa omikanda.
“Oloye u kale po ndee to mono oumwene walo opo u dule oku li fiila ounona voye,” osho a ti ngaho.
Okwa indila ovakalimo va amene oufemba womadu avo manga omashangifo taa twikile.
