Ovaherero nOvanama nava kwatele komesho efiku lokudimbuluka omadipayo a nghi na nghenda – Nudo

Evava lovanyasha longudu yoNational Unity Democratic Organisation (Nudo) otali pula omukalo uwa wa kwatela mo ovanhu aveshe nou li pamufika uwa wondjokonona u longifwe mefiku lokudimbuluka omadipayo a nghi na nghenda.

Eshi osha kwatela mo okuyambidida omafiku oo taa pulwa kOvaherero nOvanama omo ngeno mu kale hamu dimbulukiwa efiku eli, evava lovanyasha osho la ti ngaho momukanda wokufimaneka efiku ongula yEtitatu.

“Omanga evava lovanyasha loNudo la tambula ko efimano lomafiku 28 Mei ongefiku epangelo loukoloni laGerman lapata eekamba odo kwa li tadi ningilwa omahepeko, otwa itavela kutya omukalo wa kwatela mo ovanhu aveshe nowa yuka pandjokonona owa pumbiwa,” Omukanda osho wa ti ngaho.

Ongudu ei otai pula opo ngeno efiku eli li kale hali dimbulukiwa momafiku 02 Oktoba ile momafiku 12 Apilili shaashi momafiku omo omo kwa li mwa tamekwa omadipayo a nghi na nghenda.

Omukanda wavo owe ya eshi president Netumbo Nandi-Ndaitwah a pula Ovaherero nOvanama opo va tambule ko omafiku 28 Mei ongefiku lokudimbuluka oshiningwa eshi shomadipayo a nghi na nghenda la tokolwa kepangelo.

Ashike nee, ongudu ei oya ti epangelo nali kundafane noiwana oyo ya kumwa koshinima eshi.

“Omafiku aa okwa kufwa mondjokonona ile yoiwana oyo ya kumwa notaa holola kutya omahepeko avo okwa tameka naini,” Omukanda osho vali wa ti ngaho.

Evava lovanyasha loNudo natango ola pula epangelo opo li kundafane noiwana oyo ya kumwa koshinima eshi opo ku talululwe oshinima eshi, tali pula yoo kuningwe opolohalama yopamufika ya kwatela mo oiwana oyo ya kumwa, omishangwa odo di li po nosho yo omaumbangi hokololo ooluxupe.

Natango oya yandja yoo oushima konhele oyo ya hoololwa i patululilwe oshivilo, Parliament Gardens, ponhele yaasho otai pula oshivilo eshi shi kale hashi ningilwa peenhele da yooloka dopandjokonona ngaashi Ohamakari, Ozombuzovindimba, Okahandja, Swakopmund noShark Island.

“Osha fimana opo omahokololo ooluxupe novakwapata voonakufya a kale mokudimbuluka efiku eli, taku kwashilipalekwa kutya ondjokonona oya yandjwa nawa komapupi tee ya,” Evava lovanysha osho la ti ngaho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.