Ovahangwena va udifwa nai kevako loikulya yoshikukuta

Evako loinima yoshikukuta yongushu yeedola omayovi mahapu oyo ya vakwa kOhangwena ola nyematifa nokuudifa nai Ovahangwena neenghono.

Opolifi moshitukulwa shaHangwena, Etine la dja ko oya lopota oungangala woinima yOshikukuta oyo ya vakwa momungulilo yavo kOshikango i na ongushu yoN$600 000, oinima oyo ongaashi nee omaadi okulya, eeshi ndomeendoxa, eeshako doufila wepungu, omakumbafa nomatalashe.

Oshinima eshi oshe ya poluheela konima eshi ngoloneya woshitukulwa shaHangwena Sebastian Ndeitunga a holola kutya omaumbo omwaalu u fike po48 000 moitukulwa yokomikunda nomeedoolopa moshitukulwa shaHangwena ee li momumbwe yoikulya omolwaonghalo yondjala eyi ya naipala.

Meenghundafana noThe Namibian Etivali loshivike sha dja ko omukalimo womomukunda Omundaungilo, Ephraim Haihambo, okwa ti momukunda wavo omu na nale omaumbo a fika po50 e li momumbwe yoikulya. “Ovanhu vetu otava fi ondjala ashike otashi nyemateke okutala ovanhu tava kwena medina lomumbwe yoikulya. Otu na Ovayelele moshitukulwa ovo hava xupu unene moikulya yoshikukuta ashike kapu na sha ashike oikulya,” Mwene womukunda Oidimba yaNakalunga moshitukulwa shaHangwena, Tate Gabriel Henkali, osho a ti ngaho.

“Ovanhu vamwe nande nee ohava tambula opendjela itava dulu ashike okulanda oikulya. Ondjala oya ninga oshinima sha kula moshitukulwa, otushi shi nokutya ope na ovanhu vamwe ovo ve na oikulya ashike natango ovanhu vahapu kave na sha oikulya nandenande. Atushe otushi shi kutya eteyo lo2023 kala li liwa omolwaomuloka oo kwa li inau wana. Odula ya dja ko omaumbo ashike e li lwopo14 omomaumbo e li o30 a mona evatelo loikulya yoshikukuta. Paife otu udite vali kutya opu na ava ve lineekelelwa okutuvikila nokutukula oikulya yoshikukuta ndele ove lipyakidila vali nokuvaka. Otashi nyemateke okumona kutya opu na ovanhu kave na onghenda vookave na ko nasha novakwashiwana,” osho Henkali a ti ngaho.

Omukulupe weedula (86) Ndilimeke Kandjembo, wokomukunda Ekolola popepi nEenhana oha di nounona omulongo meumbo laye. Ashike aveshe ova tala ashike mopendjela yaye.

“Onda loloka, keshe efiku kandi udite ashike nawa. Ondi na ounona vahapu ovo handi file oshisho, ounona navo ova weda ko koudjuu wange. Ohatu fi ondjala, okapendjela kange inaka wana okukwafela ounona aveshe ovo. Onda mona ovashiinda shange tava pewa oikulya yoshikukuta ashike ame meumbo lange inamu pewa nandenande, vakwetu ova pewa ngaa oikando ya yooloka..” Kandjembo oo kwa li e li omutumba pondje yombelewa yOpoosha mEenhana a hala okunana oshimaliwa opo a ye koshipangelo shaashi ke udite nawa, osho a hokolola onghalo ngaho. Oo e li omunashipundi mombelewa yelelo nokangudu oko haka ungaunga noinima yoshikukuta, Erickson Ndawanifwa, okwa pula oshiwana opo shi ngungumane noshi teelele opolifi i mane omakonaakono a yo.

“Onga tu li ovaleli voshitukulwa otwa nyematekwa konghundana yevako lovanambelewa vetu, alushe ohatu lilile ombelewa yOmuprimaminista kutya otwa hala evatelo loikulya yovakwashiwana ndele natango otu na vali ovanhu tava vake. Nashi didilikwe kutya kape na nande ookamsela va kufa ombinga mevako eli, ola ningwa ashike kovanambelewa vetu vopedu ovo hava longo netopolo loinima oyo,” osho Ndawanifwa a ti ngaho.

“Ongheene natu ngungumaneni ndele hatu teelele opolifi i ninge omakonaakono nomangu i tokole ngee aveshe ovo va kwatelwa mo moshiningwanima eshi ove na ondjo shili.” Ovanailonga vavali hava ungaunga nopolohalama yoshikukuta melelo lopashitopolwa, ova dimbulula kutya omwaalu womakende omaadi okulya owa shuna pedu nonande kakwa li pa ningwa ehavaleko lasha oivike ya pita.

Omukwatakanifi womakonaakono oimbuluma moshitopolwa shaHangwena, omupedu komufala Zacharias Amakali okwa popya kutya evako ola ningwa pokati komafiku o29 Septemba nomafiku o12 Decemba.

“Omakonaanakono opetameko aa ulika kutya ovafeekelwa otashi dulika va longifa oshipatululo shomungulilo okumona oupitilo molwaashi kape na eshi tashi ulike kutya omuvelo owa patululwa noudjuu.”

“Oukwatya woinima eyi ya vakwa po ongaashi omakende omaadi okulya e li 630 eemililita 750, oshoyo imwe ihapu, oyo kumwe yongushu yoN$ 627 270 000,” Osho a ti ngaho.

Meenghundafana noThe Namibian, omukulunhuwiliki mombelewa yelelo loshitukulwa shaHangwena, Fillipus Shikongo, okwa koleka evako loinima oyo, ashike okwaanya okutya ko sha moule, nokwa popya kutya onghee kwe lipyakidilwa nomakonaakono nouyelele otau ka yandjwa diva koikundaneki, ngee a pu. Ovafeekelwa ovo ova holoka nale lwotete momangu yamagesitrata waHangwena, mOmaandaxa.

Ovafeekelwa ava ovo nee Jeipo Hilongea (42), Nehemiah Shoovalwka (36), Miina Uukule (38), Gerry Van Wky ( 42), Fillemon Shikongo (44) naSimon Joseph (33).