Outondadi ohau eta omadipao

Christof Fredricks (30), okwa li a hangika a nangala ongali eshi olutu laye kwa li la monika, okwa hangika a tuwa oikando 32 yee okwa hangi a dulwa noilyo yaye yopaumwene oya hangika ya tenekwa monulo yaye omanga oikutu neenghaku daye da hangika nda napakana popepi naye.

Efyo laFredricks ola eta omwaalu womashenge oo kwa li a dipawa eedula da dja ko medina noutondadi puhamano, ehagano li na sha nefikopamwe loufemba moNamibia osho la ti ngaho Etine la dja ko. Opolifi yaNamibia inai talulula omwaalu ou, ashike nee, opwa kala pu na oibofa ya yooloka okudja ngaa petameko lodula ei.

Olutu laFredricks okwa li la hangika kOtjomuise kolukanda la7de Laan mOvenduka Etine loshivike sha dja ko.

Omukainhu ou weshenge okwa li a monika lwaxuuninwa kofamili yaye ongula yetitatu loshivike sha dja ko eshi kwa li a longela oikutu yaye opo vati a ka talele po kaume kaye.

Ehangano loufemba u fike pamwe moNamibia ola yandja ombedi koilyo yomomutumba wopashiwana nokonotwaveta yopaumwene yoshilyo shoSwapo Jerry Ekandjo oyo kwa li ya pita meumbo lotete lopashiwana nomeumbo etivali lopashiwana oyo tai lalakanene okufatululula oshitya ovalihomboli nokulundulula okatendo kohombo komomudo 1961 opo ku kelelwe eehombo domashenge moNamibia.

“Omadipayo a nghi na nghenda omashenge moNamibia oindjemo yeeveta doutondadi odo da ningwa mopaliamente.

“Okudja ashike eshi opaliamente ya pitifa onotwaveta i li ominge nomashenge muJuli 2023, otwa kanifa nale omashenge ahamano medina ashike loutondwe nomadipayo. Eelopota otadi twikile nokuholola kutya oonakuningwa oihakanwa ohava kala va mangwa, ohava hangika ve li hamunghele ndee molopota yopaife, oilyo yavo yopaumwene ohai hangika ya tetwa ko,” Ehangano osho la ti ngaho.

Minista wounamapya nounaimuna nomatendululo omadu Calle Schlettwein Etine loshivike sha dja ko okwa ti: “Onda udifwa nai neenghono nondi na omalipulo kombinga yomaliumbato aa a nghi na nghenda.

“Kandi na oumbangi wa wana kutya onotwaveta ei oyo tai eta oinima i li ngaha, ashike eshi sha ningilwa omashenge osha talika ko kutya oimbuluma kwaavo tava yambidida onotwaveta, ongovanhu inava halika moshivana novanhu va tongolwa nongudu yovanhu hava ningwa nai.

“Okuliumbatela ovanhu ngaho moshiwana inashi fimaneka omulandu wefikopamwe moshiwana.

Kashi shi ngeno kutya itashi tu ashike kumwe nekotamhango laNamibia, kashi shi shopaunhu.” Eshi kwa li Max Katjimune woPDM oo e li oshilyo shopaliamente a dengelwa Etine loshivike sha dja ko opo a tye ko sha okwa ti: “Kandi na oumbangi wa wana opo ndi dule kutya onotwaveta yaEkandjo oyo ya eta omadipao aa.

“Eshi sha yela, nande ongaho, okutya ashike onotwaveta yaEkandjo otai eta oshiponga komashenge ngee oya kolekwa kupelesidente ndee tai ningi oveta, shaashi otai yandje ehandukilo leedula hamano ile omunhu a fute oshimaliwa shi fike poN$100 000 ngee okwa hangika ta popile eehombo domashenge ndee eshi onde shi kelela eshi kwa li onotwaveta tai kundafanwa meumbo lopashiwana.

“Oshitya okupopila nasho inashi fatululwa nawa monotwaveta, natango osha nyika oshiponga koshiwana ashishe momhango omo shaashi otashi dulika longifwe momukalo wa puka.”
SHI NYANYALEKA

Ina mumwaina waina waFredricks, Benigna Visser Etine loshivike sha dja ko okwa li a dengelwa ongodi komunhu ehe mu shi temu lombwele “[Oitya ya tukana] okwa li a dipawa”.

“Omutima wange okwa li wa wa pedu konima eshi nda dengelwa ongodi oyo, shaashi omudengi okwa ti, nakufya okwa li kwa monika kutya oye ‘Sexy Charmy’, edina laye eli hatu mu ifana keumbo.

“Eshi twa ya ponhele opo pwa ningilwa oshinima eshi, otwa mona oshikutu shaye shilaula divadiva, eexwiki nokapendi ke li pedu,” Visser osho a ti ngaho.

Okwa ti otaanye okuuda ko oshinima eshi noku na elineekelo kutya Fredricks ote ya keumbo.
“Oshi nyanyaleka nai okuninga oshinima shi li ngaho,” Osho a ti ngaho.

“Ondi wete kutya oshinima eshi okwa li sha ningwwa kovanhu vedulife puumwe, shaashi omunhu ota tete ko oilyo yaFredricks yopaumwene ngahelipi ndee tei tula monulo yaye, olutu laye oli na oipute i li 32 eshi a tuwa,” Osho a ti ngaho.

“Paife ngaha atushe katu shi ashike kutya olyelye e na okukala a ninga oshinima shi li ngaha, shaashi kakwa li e tu mangulukila e tu lombwele kutya okulimekwatafano lopaihole nalye,” Visser osho a ti ngaho.

Omupopiliko wopolifi Elifas Kuwinga Etine loshivike sha dja ko okwa koleka kutya olutu laFredricks ola monika komweendanandjila li li momulamba popepi nofikola yedina Chairmain Mao Zedong High School kOtjomuise.

OMBEDI OYA JERRY

Omukulunhuwiliki wehangano ledina Out-Right Namibia Agapitus Hausiku Etine okwa ti oinima i li ngaha otai etwa konotwaveta yaJerry.

“Ashishe osha etwa konotwaveta yaEkandjo. Ovanhu ava ova kala moshiwana nombili, ashike konima ashike yonotwaveta opa kala pu na oimbuluma ihapu tai ningilwa omashenge moshiwana,” Osho a ti ngaho
Hausiku okwa ti oibofa yomadipayo otai i komesho keshe omwedi notai limbililike neenghono.

“Omwaalu kau shivike, shaashi vamwe inava lopotwa ndee medina laasho, katu udite tu na eameno vali,” Osho a ti ngaho.

“Olutu ola tuwa oikando ihapu noilyo yopaumwene yanakufya okwa li ya tetwa ko ndee tai tulwa monulo yaye. Oikutu yaye oya hangika kokule kashona nolutu laye neehonde di li mopate,” Osho a ti ngaho.