Omukulunhufikola mupe wofikola yedina People’s Primary School Etivali okwa li a tula ounona vofikola pedu omafiku avali shaashi vati ove na omambo ofikola a kaka.
Momukanda, oo wa monika koThe nambia, ovadali okwa li va lombwelwa kombinga yetulopedu lounona vavo molwekako nokukala vehe na omambo ofikola oo taa pulwa.
Ounona ove li okudja mondodo 6 no7. Ofikola oya hala okutula pedu ounona vomondodo oninhano ovo ve na omamba inaa djala woo okwa kaka.
Omudali wokaana ke li mondodo 7, oo ina hala oukwatya waye wa tumbulwa shaashi okwa tila okaana kaye ka ka ningwe nai, okwa ti: “Omambo omonakadona wange amwe kakwa li a djala, ashike ito dulu okukala wa teelela omunafikola a kale nomambo a yela sha yuka nale pexulilo lodula.”
Omukulunhufikola pofikola apa Elsandra Skrywer konima yomwedi eshi a ulikwa, okwa ninga omatalelo opo a tale kutya ovanafikola otave lilongedile ngahelipi ekonakona laxuuninwa.
“Eshi nda ya kondodo onhiheyali, okwa li nda kumwa eshi nda mona kutya ovanafikola vamwe kave na omambo oo a pumbiwa ile vamwe ove na ashike omambo e na oinima inai pwa okushanga,” Osho a ti ngaho.
Skrywer okwa ti, itashi shiva ovanafikola va ye kofikola vehe na omambo avo sha yuka pexulilo lodula. Okwa ti omambo okwa li a yandjwa kofikola omanga amwe kwa li a landwa kovadali vounona.Omukulunhufikola okwa ti okutula pedu ounona okwa li ashike omukalo wokushiivifila ovadali onghalo oyo omambo ounona vavo e li muyo. “Etulopedu olo la fininika ovadali va tye ko sha ndee tava tale omambo ounona vavo ndee amwe tave adike nokuli,” Omukulunhufikola osho a ti ngaho. Omukulunhufikola okwa ti ofikola oya kendabala okudengela ovadali vounona ovo vehe na nande embo omanga inava tulwa pedu. “Natu kale hatu ningile ovadali omatilifo okutula ounona vavo pedu opo va tameke okukala ve na ko na sha?” Osho a pula ngaho.
Omukunhulufikola okwa ti okwa yandja efimbo kovadali fiyo okonima yokafudo oko take ya, pokati komafiku 06 fiyo 13 Septemba, opo va kale va mona omambo oo a kana ndee tava longekidile ovanafikola ekonakono.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
