Ouministili wehongo, omaduto oinima ipe, ovanyasha,omaudano, omaunghulungu nomifyuululwakalo otau ti nande kapu na omulandu tau ngabeke ounona vofikola va etelele oikulya komihandjo, okatendo kehongo lopetameko oka pitika omatokolo oludi eli.
Oshinima eshi osha landula etokolo lofikola yedina Leevi Hakusembe Scondary School moshitopolwahoololo shaKavango Ushilo, tali ngabeke ounona vaha etelele oikulya komuhandjo, tai ti ohashi eta vaha ye va ka lye kekulo.
Omukulunhufikola Amandus Hamutenya omwedi wa dja ko okwa ti oikulya ihapu kwa li ya longekidwa oya hepa shaashi ounona otava li oikulya yavo vene oyo va dja nayo komaumbo.
Ovadali vounona pofikola opo omwedi wa dja ko ova popya kutya ounona vavo ova nyenyeta ondjala, tava ti oikulya oyo hava pewa mofikola inai wana.
Ovadali ova pula ouministili wehongo u tale nawa oshikumungu eshi.
Omukulunhuwiliki woministili Erastus Haitengela, okwa ti okatendo kehongo okayandja eenghono kelelo lofikola li kufe omilandu odo di li mouwa wounona nomudingonoko wofikola.
Okwa ti ohashi kelele okuhepeka oinima oyo ya yandjwa kepangelo.
“Etokolo lofikola onghendabala yowina i li pamwe nomulandufaneko woministili womudo 2025-2030, oo wa fimaneka oveta yefikopamwe, eameno nomudingonoko wokulihonga u na oundjolowele,” osho a ti ngaho.
“Osha fimana okudidilika kutya eli kakwa li ashike etokolo lomukulunhufikola, ashike etwokumwe la ningwa pefimbo leenghundafana novadali kukwashilipalekwe efikopamwe neyambidido lovakufimbinga,” osho a ti ngaho.
Okwa ti okuxulifa po okuuya noikulya komihandjo okwa fimana opo kuxwaxwamekwe ouyuki wopanghalafano shaashi ounona vamwe itava dulu okulanda oikulya.
Okwa weda po kutya oikulya oyo ya tuvikilwa momuhandjo okwa li tai eta oupuka, mwa kwatelwa omakokolotye nokukupulashi oinailona inaku amenwa noutuviko vomakende luhapu ohaku fitike ominino.
“Ouministili otau yambidida onghendabala ei ongomulandu womondjila tau lalakanene okuxwaxwameka oukoshoki, elandulafano noundjolowele wopamadilaadilo wounona aveshe.
Otai kwashilipaleke kutya kapu na okaana taka kala ke udite ka patelwa kondje medina longhalo yomaxupilo ako,” Haitengela ta ti.
