Oulumenhu kau fi okuninga oinima inai yuka – Ndaitwah

Leitenanda Denga Ndaitwah Etitano okwa pula ounona vofikola opo ve likaleke kokule nokulongifa oingangamwifi nomalodu, ta kunghilile kutya elongifonai loingangamwifi nomalodu ola nyika oshiponga kehongo.

Oshinima eshi okwe shi ninga pefimbo loshikonga shouyelele kombinga yelongifonai loingangamwifi osho kwa li sha ningwa kofikola yedina Dr Lemmer Secondary School koRehoboth Etitano.

Oshitufi okwa li sha longekidwa koministeli yehongo, Omaduto oinima ipe, ovanyasha, omaudano, omaunghulungu nomifyuululwakalo.

Eshi kwa li ta popi nounona, Ndaitwah, oo e shiivikile nawa okupopila ovamati, okwa ti oulumenhu woshili ohau monikila momikalo, oushili noinakuwanifa ndee kashi fi momikalo da nyika oshiponga ile tadi piyaaneke.

“Okukala omulumenhu inaku ulikwa okudilila moilonga ya puka,” osho a ti ngaho, ta indile ounona va ninge omahoololo oo taa amene oundjolowele wavo neyokomesho mehongo lavo.

Okwe va twa vali omukumo opo va kale ve litula mo melihongo lavo ndee tave likaleke kokule nomahepaunina, unene ngaa elongifo lomalodu noingangamwifi, oyo a ti kutya ohai imbi ovanyasha va hange eendjodi davo.

Ta hokolola kashona kombinga yonghalamwenyo yaye, Ndaitwah okwa ti omikundu mehongo laye lopetameko, okwa li da xwaxwamekwa komudingonoko uhe li nawa pefimbo lepangelo lokatongotongo, node mu honga efimano lokukondjifa nokukala e na omikalo.

Okwa yeleka kutya omaudjuu onhumba inaa holola onakwiiwa yokaana, ta popi kutya elitulemo nokulineekela mwoove mwene otaku dulu okweeta eyokomesho.

Ngoloneya woshitopolwahoololo shaHardap Riaan McNab, oo naye kwa li a popya nounona, okwa ti oingangamwifi, unene ngaa omalodu noingangamwifi, “oinima tai heke ya nyika oshiponga” oyo hai teyaula po eefamili noiwana.

Okwa londwela ounona vaha kufe ko elongifo longangamwifi la fa okulihafifa kuhe na omukundu washa.

“Kapu na nande oshiwana tashi dulu okuyambuka po ngee ounona vasho ova pikwa, pookapu na nande oshiwana tashi dulu okuya komesho ngee ovanyasha vasho ova teyaulwa po,” McNab osho a ti ngaho, ta pula ounona va fimaneke elihongo, va kale ve na omikalo neendjodi defimbo lile ponhele yokukala ashike ve na eendjodi dopakafimbo domalihafifo.

McNab okwa yeleka yoo vali kutya oRehoboth oya ninga okaumbo kokulongifa nai oingangamwifi.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.