Oukwashilyo waShipwikineni okwa li nale waxulifwa po – Shaningwa

Hamushandjai woSwapo Sophia Shaningwa okwa ti oukwashiliyo waReinhold Shipwikineni okwa li nale wa xulifwa po manga nokuli ina shanga omukanda wokushiivifila ongudu kutya ote i fiye po.

Oshinima eshi oshe ya konima a fiya po ongudu medina loulingilingi oo ongudu ya ninga efiku muwo.

Shaningwa okwa ti oukwashiliyo waShipwikineni okwa li nale wa xulifwa po konima a ninga oinima ihapu oyo kwa li i li ominge nomalalakano ongudu ile tai yambidida eengudu ile omahangano oo taa lalakanene oinima oyo i li ominge nongudu.

Oshinima eshi oshi li momukanda waye womomafiku 19 Mei oo wa nyolelwa Shipwikineni.

Shipwikineni oudula ya dja ko okwa li a twala ongudu komhangu eshi vati inai ninga oshoongalele shokuhoolola ovavaleli vongudu osho ta ti “kashi li paveta” konima yefyo lapresidente Hage Geingob.

“Nokuli, ngee owa kala wa limbililwa kutya owakanifa oukwashilyo woye wongudu yoSwapo, ekanifo loukwashilyo woye okwa li la kolekwa odula ya dja ko eshi kwa li wa yambidida moshiwana ongudu yopolitika napresidente wayo oo ta lalakanene osho ongudu itai popile.”

“Fyee, keshe efimbo, otu wete kutya ku li nawa ngee konima yoinima aishe oyo wa ninga unene ngaa kombinga yeyambidido loye longudu imwe yopolitika natango oto lipula kutya ove oshilyo shongudu yoSwapo,” Osho a ti ngaho.

Nomatomeno oo, Shaningwa okwa ti ongudu oya kala nale i wete kutya Shipwikineni ke shi vali oshilyo shongudu.

Shaningwa okwa weda po kutya Shipwikineni okwa kanifa oukwatya nefimano lokukala oshilyo shongudu yoSwapo.

Okwa ti oshinima eshi oshi li mouwa wongudu nokwa itavela kutya Shipwikineni okwa li e udite kutya ota etele ongudu oupyakadi wakula ashike okwa dopa nee pamhito ei.

“Swapo ote ku dimbulukifa kutya, nande owa kanifa oukwashilyo woye, owa twikila okukondjifa oshibofa shoye momhangu yopombada omo to ti ou na oufemba wokukala oshilyo shoSwapo,” Osho a ti ngaho.

Okwa ti ongudu otai mu dimbulukifa kutya natango oya kanifa oimaliwa movakalelipo vopaveta medina laye.

Omukanda ou, okwa ti, otau ka yandjwa momhangu opo ku pulwe kuningwe etokolo lokufuta ngee ina kufa mo oshibofa shaye moule womafiku atanho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.