Ovahongi omafele moshitopolwa shaZambezi ovo tava kongo oilonga ova ti ova hala oukonaakono ovo hava shangwa opo u mone oilonga va xule po ndele taku tamekwa okuningwa omufindani omunelao. Eshi ove shi popya shaashi ove udite kutya omapulo oukonaakono ohaa vakwa.
The Namibian eshi a popya naavo ve lihongela ouhongi ashike inava mona oilonga kofikola yedina Mavuluma Combined School Etine la dja ko, oko kwa li ku na ovanhu ve dulife po300 va shivwa kokakonaakono komhito ashike imwe yoilonga yeendodo dopedu.
Umwe womwaavo kwa li ve ya okushanga okakonaakono aka, Mibert Makatazo, okwa ti oukonaakono aveshe ihava ningwa paushili, omu na oulingilingi nolwaamambinga.
Okwa ti ovakufimbinga alushe ohava lande omakonaakono ile va fute oohandimwe opo va mone oilonga. Ovakufimbinga vamwe ove holike shi dulife vakwao, osho a ti ngaho.
“Paife ngee owa i fanwa kokakonaakono okuwanifa po ashike omilandu, shaashi oilonga oya yandjwa nale komunhu umwe ou a futa ovo hava ungaunga nokukuta opo a mone oilonga.
“Ashike nee, otwa itavela kutya ngeenge opwa totwa oshinima eshi shomufindani omunelao, oshiima eshi otashi mono exulilo. . . ngee omunhu ina dja mo oteshi tambula ko ashike, oshe likolelela unene kelao lavo,” Makatazo osho a ti ngaho.
Umwe oo e lihongela ouhongi ashike ina mona oilonga fiyo opapa, Davis Sikota, okwa ti okwa kala nokushanga oukonaakono voilonga oule weedula nhatu paife ashike ina mona oilonga fiyo opapa, ota dopa ashike.
“Pamhito ei, kandi wete ngeenge ohava talele ngaa eembapila adishe, mutu ohava talele ashike dotete di li omulongo. Onda didilika kutya noho unene oukadona ashike hava mono oilonga ei.
“Oshinima shimwe natango ovahongi ava opo va mane elihongo lavo paife ohava ulikwa ashike, omanga fye ava twa mana nale elihongo letu konima yeedula 5 ile 10 ihatu talika. Onghee nee, okuninga oshiima eshi shomufindani omunelao osho ashike tashi dulu okuninga oinima pauyuuki,” Osho a ti ngaho.
Nasilele Sisamu, okwa ti okwa hepeka oimaliwa ihapu opo e uye okushanga okakonaakono.
“Oshinima shi na ondilo nai, ashike ohatu shi ningi, shaashi otwa hala nokuhalelela okumona oilonga,” Osho a ti ngaho.
Omukulunhuwiliki mounistili wehongo, ounghulungu nomifyuululwakalo, Sanet Steenkamp, Etitatu okwa ti ouministili ou na eshiivo kombinga yomanyenyeto ovahongi ovo vehe na oilonga, owa tuma okakomisi opo ke va konaakone. “Otwa yakula omanyenyeto aa okudja kokakomisi kokukondjifa oimbuluma moshilongo (ACC). Ohatu tumu ko ongudu oko, omo nda tula ovanhu va dja keeministili dimwe, oyo tai kala ya lalakanena okukonaakona oupyakadi ou.
“Omanyenyeto aa a yakulwa okwa li unene e nasha naavo hava kutu, opo pwa didilikwa olwaamambinga noulingilingi.
“Ongudu oya ongela osho tava ka konaakona, notai ka kala moshitopolwahoololo moshivike tashi ya.
“Omanga twa teelela oidjemo yomakonaakono, ohatu ka tala ngee ovanhu ovo hava ungaunga nokuyandja oilonga nghee hava longo nonghee hava landula eemhango, opo hatu ka tala nghee hava yandje oilonga,” Osho a ti ngaho.
Steenkamp okwa ti ouministili ohau landula eemhango odo da tulwa po kombelewa yomuprima minista. “Onghee nee, ngee ou na omwaalu u hapu, ou na okuyandja okakonaakono kokushanga opo u kufe mo ovanhu vamwe.,” Osho a ti ngaho.
Steenkamp okwa ti oshi li omupya unene shaashi ouministili itau dulu okukufa po ovanhu aveshe ovo vehe na oilonga. Okwa li kwa pitifwa eemhito doilonga di li 723 moitopolwahoololo aishe omafiku twa dja.
Omukulunhu wehongo koshitopolwa oko, Joseph Kawana, ina nyamukula omapulo oo kwa li a tuminwa Etitatu.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
