… LPM otai lundile Seibeb kutya oku na ekwatafano noSwapo
Omupedu pelesidente mukulu wongudu yoLandless People’s Movement (LPM) Henny Seibeb okwa ti okwa fiya po ongudu konima eshi kwa li a lundilwa kutya okwa pewa oilonga koSwapo. Etivali, odjo imwe yomongudu yoLPM oya lombwela oThe Namibian kutya Seibeb nahamushangandjai Edson Isaacks ove na ohokwe yokushuna koSwapo.
Seibeb naIsaacks okwa li va fiya po ongudu yoLPM nopaliamente Etivali konima yeedula di li lwopunhatu.
Efiyepo longudu laSeibeb ole ya nale konima yeemwedi mbali eshi kwa li ta fininikwa kongudu opo a yandje ombili eshi a ti oLPM ongudu yOvanama. Oshilyo shoSwapo nomupedu minista woikwameni, omatembu neameno Lucia Witbooi okwa lombwela oThe Namibian Etivali kutya otava tambula ko keshe umwe ou e na ehalo lokuwaimina ongudu.
“Itandi popile ko Swapo ile LPM, okutya ohandi ti ashike omivelo doSwapo oda yeulukila keshe umwe oo kwa li a fiya po ongudu ndee paife okwa hala okwaaluka.”
Isaacks okwa ti etopauko eli ola kala nale tali uya.
“Onda kala nokulundililwa oinima ihapu oyo ihai kolekwa kutya oyoshili. Mongudu kamu na ouyuki,” Isaacks osho a ti ngaho.
OMUKALO UWA
WOKUVEEFA VAYE
Omuwiliki wongudu yoLPM Bernadus Swartbooi eshi a popya noThe Namibian Etivali okwa ti Seibeb naIsaacks kave shi oilonga yavo nova ulika kutya itava dulu okulididimikila efimbo.
“Kashi shi ashike oshinima sheedula nhano, oshinima tashi pula efimbo lile. Onghee nee, otwa hafa,” Osho a ti ngaho.
Okwa ti kutya Seibeb naIsaacks ovanhu vadjuu okulonga navo”.
“Otwa kala nokuumbata omikundu didjuu oule weedula nhano. Otwa kala nokuumbata omunhu, otwa kala ashike hatu lele. Kakwa li hatu dulu okupopya oinima oyo, shaashi omunhu oo natango okwa li e li na fye. Otwa kala tu na omafiku adjuu novanhu ava,” Osho a ti ngaho.
Omakwatafano opailonga noilyo yongudu ikwao okwa kala a tilifa.
“Okwa li shidjuu okulonga navo. Paukwatya welelo longudu ovanhu ihava popi naana oinima yomeni longudu. Ashike owa mona kutya onda kalanda mwena eshi ovanhu kwa li tava lundile nge,” Osho a ti ngaho.
Swartbooi okwa ti ongudu oya kala nokukendabala opo i konge eemhito yoo i dule okukundafana oinima ei okudja muJanuali. Isaacks okwa ti okwa li a yandja nomhito yawana koLPM opo i wapaleke omapuko ayo ashike kapu na eshi sha ningwa po.
“Okwa li nda xulifa po okuya keembelewa dongudu, oule weedula di li nhatu inatu kala tu na ekwatafano. Ongudu oya ninga po ashike oshinima shomunhu umwe. Kapu na nande efiku kwa li nda shivwa koshoongalele shongudu nande oshimwe, onghee nee okwa li ashike ndi na okukatuka onghatu ya pumbiwa,” Osho a ti ngaho.
Isaacks okwa patana kutya kapwa li nande eenghundafana kombinga yaasho sha pumbwa okuningwa po ile sha pumbwa okuwapaleka.
“Kapwa li omunhu ta file mukwao oshisho, iha pandula ashike oshovakwao va eta poshitaafula. Ongudu oi na okukala i na owino wa yooloka ndee hamunhu ashike umwe. Ou wete kutya Swartbooi omunaipupulu nai,” Osho a ti ngaho.
ITASHI KUMWIFA
Omundjadjukununi woikwapolotika Rui Tyitende okwa ti okufiya po ongudu kwaSeibeb oshinima sha kala sha teelelika nale. “Keshe omunhu e na ehalo lokutala nawa opolotika yetu oku na okukala eshi mona nale kutya Seibeb ota i. Oule weemwedi nhano da pita, opwa kala pu na omalipulo ngee natango yee oshilyo ngaa shongudu ile keshi oshilyo, sha etwa kwaasho yee kwa li a lombwela oikundaneki,” Osho a ti ngaho.
Tyitende okwa ti Seibeb okwa li e na oshilonga shakula moLPM nokwa li omudilaadili a fimana mongudu nokwa ti oku na okufiya mo omwaka wakula mongudu.
“Oikundafanwa oyo kwa li a twala momutumba wopashiwana okwa li alushe i na oukwashili nokwa li ya dilaadilwa nawa.
Ashike nee, ongudu oyo ya kala i na ovaleli ihava puka ile ihava nyamukulwa, eyo lomutoti umwe wongudu nomupeduleli kali wa lela kongudu unene ngaa momudo womahoololo.” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
